Ölkəmizin sosial siyasət modelinin mərkəzində Azərbaycan vətəndaşı dayanır ŞƏRH
Bakı, 30 noyabr, AZƏRTAC
Azərbaycanda sosial islahatlar dövlət siyasətinin əsas istiqamətlərindən biridir. Prezident İlham Əliyevin rəhbərliyi ilə bu sahədə həyata keçirilən islahatlar nəticəsində mühüm irəliləyişlər əldə olunur. Dövlətin məqsədi yalnız rəqəmlərlə ifadə edilən artımlara nail olmaq deyil, eyni zamanda, vətəndaş rifahını yüksəltmək, sosial ədaləti təmin etmək və yenilikçi həllərlə idarəetmə keyfiyyətini artırmaqdır.
Bu sözləri AZƏRTAC-a açıqlamasında “İnformasiya və Sosial Təşəbbüslərə Dəstək” İctimai Birliyinin sədri Cəsarət Hüseynzadə bildirib.
O bildirib ki, son beş ildə reallaşdırılan dörd böyük sosial islahat paketi bu məqsədlərin həyata keçirilməsində mühüm rol oynamışdır. Minimum pensiyanın 2,5 dəfə, minimum əməkhaqqının isə 2,7 dəfə artırılması bu islahatların sadə vətəndaşların gündəlik həyatına təsirinin ən bariz nümunələridir. Həyata keçirilən hər bir addım Prezident İlham Əliyevin vətəndaşlara qayğı və diqqətinin təzahürü kimi qiymətləndirilir.
Azərbaycanın sosial siyasətində əsas yeniliklərdən biri elektron xidmətlərin geniş tətbiqidir. Əmək və Əhalinin Sosial Müdafiəsi Nazirliyinin təqdim etdiyi 160 xidmətdən 145-dən və ya 90 faizdən çoxu elektronlaşdırılıb. Əllidən çox proaktiv xidmət artıq rəqəmsal idarəetmənin ən yeni formatı kimi qəbul edilir. Bu xidmətlər arasında “E-sosial” portalı və “Əmək və Məşğulluq” altsistemi xüsusi əhəmiyyət kəsb edir. Bu sistemlər vətəndaşların sosial xidmətlərə rahat və şəffaf şəkildə çıxışını təmin edib, idarəetmədə şəffaflığı artırıb. Məsələn, 2024-cü ilin ilk on ayında nazirliyin e-sistemləri üzərindən edilən müraciətlərin sayı 566 milyona çatıb. Bu rəqəmlər dövlətin vətəndaşların ehtiyaclarına necə operativ cavab verdiyini göstərir.
QHT sədri vurğulayıb ki, 2019-cu ildə Prezident İlham Əliyev və birinci xanım Mehriban Əliyevanın təşəbbüsü ilə təqdim edilən DOST (Dayanıqlı və Operativ Sosial Təminat) konsepsiyası, Azərbaycanın sosial xidmətlər sahəsindəki ən mühüm yeniliklərdən biridir. Bu mərkəzlərdə indiyədək 3,1 milyon vətəndaşa xidmət göstərilib və xidmətlərdən məmnunluq səviyyəsi 98 faizi keçib. DOST konsepsiyası yalnız milli səviyyədə deyil, həm də beynəlxalq miqyasda böyük maraqla qarşılanıb. Moldova, Rumıniya və Özbəkistan kimi ölkələr Azərbaycanın bu uğurlu modelini öyrənməkdədir.
C.Hüseynzadə diqqətə çatdırıb ki, Azərbaycanın postmüharibə dövründəki sosial siyasətində şəhid ailələrinə və müharibə veteranlarına xüsusi diqqət əsas ana xətti təşkil edir. 2023-cü ildə 1500-dən çox mənzil və fərdi ev bu kateqoriyadan olan vətəndaşlara təqdim edilib. Bu rəqəm ümumilikdə hazırda 16 minə yaxınlaşmaqdadır. Bununla yanaşı, sosial-psixoloji dəstək və reabilitasiya xidmətlərinin təşkili dövlətin sosial ədaləti təmin etmə istiqamətindəki iradəsini nümayiş etdirir. Azərbaycanın sosial siyasəti beynəlxalq səviyyədə də böyük təqdirə layiq görülüb. Əmək və Əhalinin Sosial Müdafiəsi Nazirliyi son beş ildə 100-dən çox beynəlxalq mükafata və İSO sertifikatına layiq görülüb. DOST konsepsiyası isə Azərbaycanın sosial sahədəki yeni brendi kimi tanınmış və digər ölkələrdə tətbiq edilməyə başlanıb.
Yeniliklərin və islahatların davam etdiyini söyləyən QHT sədri deyib: “Hazırda sosial xidmətin inkişafına dair dövlət proqramı icra olunmaqdadır. Bu proqram ehtiyacı olan şəxslərə daha keyfiyyətli sosial xidmətlərin göstərilməsini, bu xidmətlərin əlçatanlığının artırılmasını və institusional mexanizmlərin təkmilləşdirilməsini hədəfləyir. Proqram, “Dayanıqlı İnkişaf Məqsədləri” ilə uyğunluq təşkil edir və “heç kəsi kənarda qoymamaq” prinsipinə əsaslanır. Əhalinin müxtəlif həssas qruplarına göstərilən xidmətlərin kəmiyyət və keyfiyyət göstəricilərinin artırılması xüsusi diqqət mərkəzindədir. Prezident İlham Əliyevin rəhbərliyi ilə həyata keçirilən sosial islahatlar vətəndaş rifahını artırmaq və sosial ədaləti təmin etmək istiqamətində uğurlu bir modeldir. Dövlətin bu sahədə apardığı işlər sadəcə sosial göstəricilərin yaxşılaşdırılması ilə məhdudlaşmır. Bu islahatlar, vətəndaş-mərkəzli yanaşmanın və davamlı inkişafın bariz təzahürüdür”.
Bölmənin digər xəbərləri
