Ölümündən sonra dörd medalla təltif olunan qorxmaz döyüşçü VİDEO
Quba, 1 iyun, Elxan Yusifli, AZƏRTAC
Vətən müharibəsi şəhidi Nuran Mirzəyev Füzuli, Cəbrayıl və Qubadlı rayonları uğrunda döyüşlərdə qəhrəmanlıqla savaşıb.
AZƏRTAC-ın bölgə müxbiri xəbər verir ki, qorxmaz döyüşçü ölümündən sonra dörd medalla təltif olunub.
Nuran Akif oğlu Mirzəyev 1999-cu ildə Quba rayonunun Dağlı kəndində dünyaya göz açıb. Alimsah Tahirov adına Qımıl kənd tam orta məktəbini bitirdikdən sonra Quba Peşə Liseyində təhsil alıb. Hərbi xidmətini 2019-cu ildə başa vuran Nuran cəbhəyə yollananadək Xaçmaz Regional Qaz İstismarı İdarəsinin Quba xidmət sahəsində çalışırdı.
Vətən müharibəsi başlayanda Nuran səfərbərlik çağırışı əsasında sentyabrın 29-da cəbhəyə yola düşüb. Cəbrayıl istiqamətindən döyüşlərə başlayan Nuran Qubadlı cəbhəsinədək rəşadətlə döyüşüb.
Döyüş yoldaşlarının söylədiyinə görə Nuran əməliyyatların birində düşmən tərəfindən minalanmış ərazini aşkar edərək silahdaşlarının həyatını xilas etməyi bacarıb. 21 yaşlı Nuran Mirzəyev oktyabrın 19-da Qubadlı uğrunda gedən döyüşdə şəhidlik zirvəsinə ucalıb.
“Nuran mərd oğul idi. Oğlum Vətən uğrunda şəhid oldu. Nuran əsgərlikdə də nümunəvi xidmət etmişdi. Vətən müharibəsində Ali Baş Komandanın çağırışına səs verərək döyüşlərə qoşuldu. Qəhrəmancasına döyüşdü, torpaqlarımızın azadlığı uğrunda canından keçərək şəhidlik zirvəsinə ucaldı. Bir ata kimi oğul itkisi ağır yükdür. Nuran evimin dayağı idi. 30 ilə yaxın idi torpaqlarımız işğal altında qalmışdı. Şəhidlərimiz, qazilərimiz canlarını fəda etdilər ki, Vətənimiz bütövləşsin. Mən oğlumla qürur duyuram. Evimin tək oğlu, başımın tacı idi. Vətən yolunda şəhid oldu. Axırıncı dəfə oktyabrın 18-də danışdıq. Hamımızdan halallıq istədi. “Vətən mənə oğul desə nə dərdim, mamır olub qayasında bitərdim” misralarını söylədi. Müharibədir, hər şey ola bilər söylədi. Səhəri günü şəhid olduğu xəbərini aldıq. Allah bütün şəhidlərə rəhmət eləsin”, - deyə şəhidin atası Akif Mirzəyev söyləyib.
Nuran Mirzəyev iki bacının bir qardaşı idi. Qəhrəman döyüşçünün xatirəsini əbədiləşdirmək məqsədilə yaşadığı kənddə abidə-bulaq kompleksi inşa olunub.
“Nuran haqqında danışmaq mənim üçün çox çətindir. Eyni zamanda da qürurvericidir. Nuran böyük-kiçik yeri bilən, hamının hörmətini qazanmağı bacaran övlad idi. O, Vətən uğrunda canından keçdi. Söhbətlərində həmişə müharibə barədə danışardı. Düşmənləri torpaqlarımızdan çıxarmaq istədiyini deyirdi. Vətən müharibəsində səfərbərlik çağırışı əsasında cəbhəyə yollandı. Döyüşlərdə komandirləri ilə birlikdə həmişə ön sırada olub. Hərbçi yoldaşları onun döyüş yolu haqqında fəxrlə danışır. Düşmənlə savaşda Nuran şücaət göstərib. Minalanmış sahəyə girəndə Nuran bunu hiss edib. Döyüş yoldaşlarını vaxtında xəbərdar edib geri çəkilmələrini istəyib. Sonra həmin minalar zərərsizləşdirilib. Nuran bundan sonra da həmişə ürəyimizdə yaşayacaq. Fəxr edirəm ki, belə bir balam olub”, - deyə şəhidin anası Təranə Mirzəyeva bildirib.
“Qardaşım olduğu üçün demirəm, amma Nuran çox gözəl qəlbli insan idi. Hər kəsin sevimlisi idi. Tək bizim üçün yox, kəndi, obası üçün sevilən biri idi qardaşım. Yaradıcılığa marağı vardı. Sintezatorda ifa etməyi bacarırdı. Arada zümzümə edirdi. Fikirləri yaşından daha müdrik idi. Uşaqları çox sevirdi. Onların qayğısına qalırdı. Sevdiyi qız var idi. İşlərimi yoluna qoyum, sonra anamgili elçi göndərəcəyəm söyləyirdi”, - deyə şəhidin bacısı Şəfəq Mirzəyeva söyləyib.
Şəhid Nuran Mirzəyev ölümündən sonra “Cəbrayılın azad olunmasına görə”, “Qubadlının azad olunmasına görə”, “Hərbi xidmətlərə görə” və “Vətən uğrunda” medallarla təltif olunub.
Bölmənin digər xəbərləri
