Ombudsman Aparatının kitab nəşrlərinin və maarifləndirmə sahəsindəki fəaliyyətinin təqdimatı keçirilib
Bakı, 1 oktyabr, AZƏRTAC
XI Bakı Beynəlxalq Kitab Sərgisi çərçivəsində Azərbaycan Respublikasının insan hüquqları üzrə müvəkkilinin (ombudsmanın) təşkilatçılığı ilə oktyabrın 1-də Ombudsman Aparatının kitab nəşrləri və maarifləndirmə sahəsindəki fəaliyyətinin təqdimatı keçirilib.
AZƏRTAC xəbər verir ki, tədbirdə Ombudsman Aparatının Hüquqi maarifləndirmə sektorunun müdiri Müqalib Mahmudov müvəkkil tərəfindən aparılan maarifləndirici fəaliyyət barədə məlumat verib. O, vətəndaşların hüquq və azadlıqları, uşaq hüquqları, gender bərabərliyi, əlilliyi olan şəxslərin hüquqlarının müdafiəsi, həmçinin insan hüquqları sahəsində beynəlxalq sənədlərin təbliği istiqamətində görülən işlərdən danışıb. Qeyd edib ki, təsisat mütəmadi olaraq müxtəlif nəşrlər, broşürlər və kitabçalar hazırlayaraq əhali arasında paylayır, həmçinin gənclərin hüquqi biliklərinin artırılması məqsədilə maarifləndirici tədbirlər keçirir.
Tədbirdə Ombudsman Aparatının İnformasiya əldə etmək hüququnun müdafiəsi şöbəsinin Təhlil və monitorinqlər sektorunun müdiri vəzifəsini icra edən Vəli Quliyev ombudsmanın müvafiq sahədə fəaliyyəti barədə ətraflı məlumat verib. O bildirib ki, vətəndaşların informasiya əldə etmək hüququnun təmin olunması, bu hüququn pozulması halları, həmçinin həssas əhali qruplarının informasiya əldə etmək imkanları daim diqqət mərkəzində saxlanılır.
Ombudsman Aparatının nümayəndəsi əlavə edib ki, xüsusən həssas qruplar – əlilliyi olan şəxslər, aztəminatlı ailələr, uşaqlar və yaşlılar üçün informasiya əldə etmək imkanlarının genişləndirilməsi, onlar üçün əlçatan formatlarda məlumatların təqdim olunması prioritet istiqamətlərdəndir.
Sonra Ombudsman Aparatının İnsan hüquqlarının müdafiəsi şöbəsinin Uşaq hüquqlarının müdafiəsi sektorunun böyük məsləhətçisi Azər İsalı uşaqların hüquqlarının qorunması, bu sahədə aparılan maarifləndirmə tədbirləri və hazırlanmış nəşrlər barədə danışıb. O diqqətə çatdırıb ki, uşaqların hüquqlarının müdafiəsi istiqamətində görülən işlər onların maariflənməsinə, hüquqi biliklərinin artırılmasına və sağlam mühitdə böyüməsinə xidmət edir. Azər İsalı Ombudsman Aparatının uşaqların hüquqlarına dair beynəlxalq və milli qanunvericiliyin təbliği məqsədilə müxtəlif broşürlər, kitabçalar və maarifləndirici materiallar hazırladığını vurğulayıb.
Ombudsman Aparatının Beynəlxalq təşkilatlar və vətəndaş cəmiyyəti institutları ilə əməkdaşlıq şöbəsinin baş məsləhətçisi Şəhla Aslanova qurumun beynəlxalq təşkilatlarla əməkdaşlıq istiqamətində həyata keçirdiyi layihələr, vətəndaş cəmiyyəti institutları ilə birgə görülən işlər və maarifləndirmə fəaliyyətindən bəhs edib. O qeyd edib ki, insan hüquqlarının müdafiəsi və təbliği istiqamətində aparılan birgə fəaliyyət ictimaiyyətin məlumatlandırılmasına mühüm töhfə verir.
Qeyd edək ki, Azərbaycan Respublikasının insan hüquqları üzrə müvəkkilinin təşəbbüsü ilə 2002–2025-ci illər ərzində müxtəlif dillərdə – Azərbaycan, rus, ingilis, Ukrayna və fransız dillərində – hüquqi maarifləndirməyə həsr olunmuş kitablar, lifletlər, bukletlər hazırlanıb və nəşr etdirilib. Ümumilikdə Ombudsman təsisatının fəaliyyəti dövründə biri elektron olmaqla 278 adda vəsait çap edilərək geniş oxucu auditoriyasına təqdim olunub. Bunlardan 190-ı kitab, 79-u liflet və buklet, 9-u isə plakatdır.
Bölmənin digər xəbərləri
