Onur Ocak: Ötən il “Bayraktar Teknoloji Azərbaycan"da 15 gənc işə qəbul edilib
Bakı, 29 noyabr, AZƏRTAC
“Bayraktar Teknoloji Azərbaycan” ölkədə yüksək texnologiyalar sahəsində əməkdaşlığı genişləndirir.
AZƏRTAC xəbər verir ki, bu fikirləri “Bayraktar Teknoloji Azərbaycan”ın baş texnologiya direktoru Onur Ocak səsləndirib.
Onur Ocak bildirib ki, belə karyera tədbirləri həm Türkiyədə, həm də Azərbaycanda böyük əhəmiyyət daşıyır və gənclərin peşəkar inkişafı üçün mühüm platforma rolunu oynayır.
“Bayraktar Teknoloji Azərbaycan”ın yüksək texnologiyalar sahəsində fəaliyyət göstərdiyini bildirən Onur Ocak bildirib ki, mühəndislikdən proqram təminatına, süni intellektdən avtonom sistemlərə, istehsaldan sahə əməliyyatlarına qədər geniş bir spektrdə fəaliyyət göstərirlər. O, həmçinin ötən ildən etibarən startap proqramlarının Azərbaycanda da tətbiqinə başlanıldığını diqqətə çatdırıb.
Onun sözlərinə görə, ötən il Azərbaycanda 775 müraciət arasından seçilən 52 gənc şirkətdə staj proqramına qəbul olunub və onlardan 15 nəfər işlə təmin edilib: “Universitetlərlə əməkdaşlıq çərçivəsində bu prosesin il ərzində davam etdirilməsi planlaşdırılır. Bu cür görüşlərin həm Türkiyəyə, həm də Azərbaycana fayda verəcəyinə inanırıq. Qarşılıqlı əməkdaşlıq gənclərin yüksək texnoloji sahələrdə inkişafına mühüm töhfə verəcək”.
Bölmənin digər xəbərləri
