OPEC+ iyul ayından etibarən neft hasilatını gündə 188 min barel artıra bilər
Bakı, 2 iyun, AZƏRTAC
Könüllü neft hasilatının azaldılması sazişində iştirak edən OPEC+ ölkələri iyul ayından etibarən istehsal kvotalarını gündə 188 min barel artıra bilər.
AZƏRTAC “Reuters” agentliyinə istinadla xəbər verir ki, qərar iyunun 7-də keçirilməsi planlaşdırılan yeddi OPEC+ ölkəsinin nümayəndələrinin görüşündə verilə bilər. Bunlar Səudiyyə Ərəbistanı, Rusiya, İraq, Küveyt, Əlcəzair, Qazaxıstan və Omandır.
Qərar təsdiqlənərsə, artım iyun ayında gündə 188 min barel təşkil edən düzəliş səviyyəsində qalacaq. Bu artım 2023-cü ildə tətbiq edilən könüllü hasilatın azaldılmasının tədricən aradan qaldırılmasının bir hissəsidir.
Bu arada, Hörmüz boğazında gəmiçilikdə davam edən fasilələr fonunda Körfəzdən tədarükün azalması səbəbindən OPEC+ ölkələri tərəfindən faktiki neft istehsalı son aylarda azalıb. OPEC-in məlumatına görə, alyansın ümumi hasilatı fevral ayında gündə 42,77 milyon bareldən aprel ayında 33,19 milyon barelə düşüb.
Analitiklər qeyd edirlər ki, yeni kvota artımı OPEC+ alyansının davam edən geosiyasi risklərə və regiondan neft ixracında baş verən pozuntulara baxmayaraq, istehsalı tədricən artırmaq üzrə hazırkı kursunu qorumaq səylərinin siqnalı olacaq.
Bölmənin digər xəbərləri
