Özbək professor: Üzeyir Hacıbəyli əsl yaradıcılıq qəhrəmanlığı göstərib
Bakı, 26 sentyabr, Günel Alıyeva, AZƏRTAC
Üzeyir Hacıbəyli dahi bəstəkardır. O, XX əsrin əvvəllərində muğam ənənələrini Avropa musiqi təfəkkürü ilə birləşdirərək, İslam dünyasında ilk operanı yaradaraq, əsl yaradıcılıq qəhrəmanlığına imza atıb.
Bu barədə Özbəkistan Dövlət Konservatoriyasının professoru, doktor Şoyista Qanixanova “Üzeyir Hacıbəyli irsi: keçmişdən bu günə” Beynəlxalq Forumun çərçivəsində AZƏRTAC-ın müxbirinə müsahibəsində deyib.
“Üzeyir Hacıbəyli milli orkestr yaradıb, dünya mədəniyyət ictimaiyyətinin diqqətini Şərqin musiqi həyatına cəlb edib”, - deyə o qeyd edib.
Professorun sözlərinə görə, xüsusilə vurğulamaq lazımdır ki, Üzeyir Hacıbəyli çətin bir tarixi dövrdə yaşayıb-yaradırdı, həmin dövr mədəniyyətlərin milli xüsusiyyətləri çox vaxt yox edilirdi.
“Buna baxmayaraq, o, Azərbaycan musiqisinin milli xarakterini qoruyub saxlamağa və aktuallığını heç vaxt itirməyən zəngin mənəvi irs qoyub getməyə nail olub”, - deyə Ş.Qanixanova sözünü yekunlaşdırıb.
Bölmənin digər xəbərləri
