Özbəkistan “Boeing” şirkəti ilə 8,5 milyard dollarlıq müqavilə imzalayıb
Bakı, 23 sentyabr, AZƏRTAC
Özbəkistan Prezidenti Şavkat Mirziyoyev dünyanın ən böyük aviasiya və kosmonavtika şirkətlərindən biri olan “Boeing Global”ın prezidenti Brendan Nelson ilə Nyu-Yorkda keçirdiyi görüşdə tərəflər arasında imzalanan sənədin əhəmiyyətini vurğulayıb.
AZƏRTAC UZA informasiya agentliyinə istinadla xəbər verir ki, Özbəkistan Hava Yolları bu şirkətlə təyyarələrin tədarükünə dair ən böyük müqaviləsini imzalayıb. Sənəddə dəyəri 8 milyard dollardan çox olan 22-yə qədər “Boeing 787 Dreamliner” laynerinin tədarükü nəzərdə tutulur. Müqavilə BMT Baş Assambleyasının Nyu-Yorkda keçirilən 80-ci sessiyası çərçivəsində imzalanıb. Paketə 14 təyyarə və daha səkkiz təyyarə üçün seçim daxildir. ABŞ Ticarət Departamentinin məlumatına görə, sövdələşmə 8,5 milyard dollar dəyərindədir və Mərkəzi Asiyada bu tipli ən böyük müqavilədir. O, həmçinin ABŞ-da təxminən 35 min iş yerinin yaradılmasını dəstəkləyəcək.
“Bloomberg” agentliyi xəbər verir ki, Özbəkistan bu müqavilə ilə yerli aviadaşıyıcının tarixində ən böyük tədarükü həyata keçirəcək və ölkənin aviasiya ekosistemini inkişaf etdirmək istiqamətində mühüm mövqeyə sahib olacaq.
Bölmənin digər xəbərləri
