Bakı, 26 oktyabr, Fidan Əlizadə, AZƏRTAC

Hər bir ölkənin keçmişində dərin kökləri olan, zamanın gedişatında formalaşmış xüsusi adət-ənənələri vardır ki, bu da xalqın milli kimliyini və mədəni irsini əks etdirir. Tarixin dərinliklərində gizlənən bu adətləri tapmaq, onları anlamaq və öyrənmək yalnız bir bilik deyil, həm də böyük bir zövq mənbəyidir. Bu, sadəcə olaraq keçmişi başa düşmək üçün deyil, həm də insanların həyat tərzi, dəyərləri və inancları haqqında daha çox öyrənmək üçün bir fürsətdir.

Həmçinin müxtəlif mədəniyyətləri tanımaq insanın düşüncəsini genişləndirməyə və dünyagörüşünü zənginləşdirməyə imkan yaradır. Fərqli mədəniyyətlər arasında olan bənzərliklər və fərqliliklər insanın sosial şüurunu artırır, dünya haqqında daha geniş və obyektiv baxış formalaşdırır.

Okeanın o tayında da bir həyat var, orada fərqli yaşam tərzləri və dəyərlər mövcuddur. Səyahət bu fərqlilikləri kəşf edərək dünyagörüşünü genişləndirmək və yeni təcrübələr qazanmaq üçün əla bir vasitədir. Bu, sadəcə, yeni yerlər görməkdən ibarət deyil, həm də özünü daha dərindən tanımaq, daxili dünyanı kəşf etmək üçün bir yoldur. Səyahət edərkən insan təkcə məkanları deyil, eyni zamanda, öz sərhədlərini də aşır və bu, həyatın ən qiymətli təcrübələrindən birinə çevrilir.

Müsahibimiz dünyanın müxtəlif yerlərini səyahət edərək fərqli mədəniyyətləri və həyat tərzlərini kəşf edən, şəxsi inkişaf sahəsində insanlara yol göstərən, meditasiya bələdçisi kimi daxili sükunəti və zehni aydınlığı təşviq edən, eyni zamanda, musiqiçi və yutuber olaraq yaradıcılığını müxtəlif platformalarda paylaşan Ahu Kamranlıdır.

- Ahu xanım, necə oldu dünyanın kəşfinə çıxmağı qərara aldınız?

- Məndə bu fikir artıq yaşadığım dünyaya sığmadığımı hiss etdiyim anda yarandı. Bəlkə başqa yerlərdə, başqa insanların gözündə fərqli tərəflərimi görə bilər və özümə yeni bir dünya yarada bilərəm deyə ümid edərək yola çıxdım.

-Səyahətləriniz zamanı yaşadığınız ən gözlənilməz və ya təəccüblü bir anı paylaşa bilərsinizmi?

- Avtostop macərası ilə Kambocanın Siem Reap şəhərində Ankhor Wat məbədinə gedib çıxmışdım. Bura doqquz əsrə yaxın yaşı olan, dünyanın ən böyük məbəd ərazisi idi. Ərazidə kiçik və böyük ölçüdə bir neçə qədim tikili var idi. Mən oraya araşdırma etmədən, yolda qarşıma çıxan insanlardan eşidərək gedib çıxmışdım. Xülasə, məbədləri gəzə-gəzə yutub kanalım üçün aradabir kiçik kadrlar çəkirdim. Sonra elə bir qədim binanın ərazisinə gəlib çatdım ki, təəccübdən donub qaldım, əsrlərlə yaşı olan nəhəng bir ağac budaqları ilə qədim məbəd binasının üstünü sarmışdı. Çox heyrətləndim. Sonra fərqinə vardım ki, buranın kənarda dayanan mühafizəçisi dəfələrlə məni çağırırmış. Eşidirdim, lakin cavab verə bilmirdim. Məhz o yerdən nə şəkil, nə də videogörüntüm yoxdur. Bu, mənim üçün gözlənilməz an idi və çox təəccüblü bir xatirə kimi qalıb.

-Hansı ölkəni ruhunuza daha çox yaxın hiss edirsiniz və bunun səbəbləri nələrdir?

- Ölkələr və sərhədlər anlayışının ildən-ilə, əsrdən-əsrə dəyişə bildiyinin fərqinə bir neçə ölkə gəzdikdən sonra daha dərindən vardım. Hər nə qədər sərhədlərə sığsaq da, sərhədsizik. Artıq dünyanı evim kimi hiss edirəm. Yaşamağa gəlincə isə, indi Tailandın bir adasında yaşayıram. Buranı həm fiziki sağlamlığıma, həm mənəvi dünyamın zənginləşməyinə və bu vəsilə ilə yaradıcılığıma müsbət yöndə təsir etdiyi üçün seçmişəm. Burada daha uzun müddət qalmağı düşünürəm.

-Reallaşdırmaq istədiyiniz daha hansı xəyallarınız var?

- Mən mövcud anı yaşamağı seçdiyim üçün həyata keçirmək istədiyim xüsusi arzu yoxdur, məmnunam. Bu dalğada qala bildiyim müddətdə ola biləcək bütün ehtimallara açıq vəziyyətdə, sadəcə, sevdiyim məşğuliyyətləri edirəm. Artıq xəyallarımı yaşadığım dönəmdəyəm.

-Sizcə həyatda müəyyən istəklərə nail olmaq üçün necə bir yaşam planı tərtib etmək lazımdır?

- Fikrimcə, istəklər üzərindən yaşam planı tərtib etmək asandır, bunu hazırda “Chat GPT” də edir. Belə ki, xəyallarını proqrama yazırsan, o da sənin üçün meta dünyasında süni həyat dizayn edir. Bəzən istəklər üzərindən planlaşdırılan həyat da eyni belədir. Bir də var əcdadlarımızın yaşadığı həyat. Sadəcə, maddədən ibarət olmayan, mənanın da qarışaraq bir balans yaratdığı, ruhun işin içinə girdiyi və vəziyyəti tamamilə dəyişdirdiyi, təbiətin, torpağın, digər yaşayan heyvanların, bitkilərin, canlıların, ulduzların, kosmosun, kainatın, enerjinin fərqinə vararaq yaşadığın bir həyat. O zaman istəklər olmur və həyatın özü öz axarını tapır, sən, sadəcə, aradabir yön tətbiq edirsən, digər var olan və yaşayan bütün varlıqlar kimi həyatını yaşayırsan.

-Həyat tərzinizin əhəmiyyətli bir hissəsini bloq hesabınızdan insanlarla bölüşdüyünüzü nəzərə alsaq, bu, sizi yormur?

- Əslində, bloquma yaradıcılıq kimi yanaşıram. Çünki uşaqlıqdan bununla əylənirdim. Musiqiləri dinləyərək, onlara xəyalımda görüntülər yaradırdım, nağıllar və şeirlər yazırdım. Sanki insanlar oturub saatlarla məni dinləyirmiş kimi danışırdım. Sonra araya məktəb və universitet zamanları girdi, başım onlara qarışdı, adətlərimdən uzaqlaşdım. Sonra bir gün yenidən bu sevdiyim quraşdırmanı öz kanalım üçün tərtib etməyə başladım. Hər nə qədər müsbət yanaşmağa çalışsam da, sosial şəbəkədir. Təbii ki, telefondan uzaqda yaşanan həyat daha ləzzətlidir. Sanırdım ki, bütün yaradıcılıq fəaliyyətlərimi elə internet üzərindən reallaşdırmalıyam. Sonradan anladım ki, bunun xaricində də edə bildiyim nələrsə var. Beləcə Handpan ifa etməyi, rəsm çəkməyi, daşlardan və misdən əl işləri yaratmağı öyrəndim. Elə günlər olur ki, internetə heç qoşulmuram və telefonumu yanıma almıram. Beləcə bir balans yaratdığıma inanıram.

-Nə deməkdir “holisapiens”?

- Holisapiens “nickname”ni Holistika və Psixologiya elminin dərinliyinə daldığım zamanlar yaratmışdım. Təxminən dörd il bundan əvvəl. Holi - Holistik, - bütünə xidmət edən mənasını verir, - kəlməsinin qısaldılmış formasıdır. Sapiens isə hərfi mənası ilə müdrik insan deyə tərcümə olunur. O dövrlər müdrikliyin arxasınca qaçırdım. Bu iki kəlməni birləşdirdikdə bütünə xidmət göstərən bilgili insan mənasını ifadə edir. Həmin dövrlərdə niyyətim öyrəndiklərimi daha asan və anlaşılan dillə insanlara da ötürə bilmək və həyatlarının hər hansı bir hissəsində inkişaflarına dəstək olmaq idi. Çünki beləliklə özüm də öyrənirdim.

-Ahu xanım, həyatınızda uğurlar diləyirəm! Müsahibə üçün bir daha təşəkkürlər.