PAKİSTANDA ZƏLZƏLƏ QURBANLARININ SAYI 200 MİN NƏFƏRİ KEÇƏ BİLƏR

11.10.2005 [17:41]
Çap et
A⁺ A^-

AZƏRTAC xəbər verir ki, Pakistanın ingilisdilli “Neyşn” qəzetinin yazdığına görə, ölkədə zəlzələ qurbanlarının sayı 200 min nəfəri keçə bilər. Nəşrin məlumatına görə, təkcə Həzərə bölgəsində 100 min adam ölmüşdür. Ən çox dağıntılara məruz qalan Balakot şəhərində həlak olanların sayı 60 min nəfərə çata bilər. Daha min nəfər adam Bataqramda ölmüşdür.

Kəşmirin Pakistan hissəsində onlarca yaşayış məntəqəsi dağılmışdır. Qəzet yazır ki, təkcə Müzəffərabadda həlak olanların sayı 20 min nəfəri keçə bilər. Bir vaxtlar gözəlliyi ilə insanı heyran qoyan Baqh (bağ deməkdir) şəhəri tamamilə dağılmışdır. Burada 70 mindən çox adam yaşayırdı.

Xilasedicilər zərər çəkmiş bir sıra bölgələrə hələ də gedə bilmirlər. Kaqhan vadisindəki kəndlər neçə gündür kömək gözləyir - oraya gedən yolları torpaq sürüşmələri və uçqunlar basmışdır. Buldozerlər və digər texnika isə çatışmır.

“Neyşn” qəzeti Pakistan ordusu mətbuat xidmətinin rəhbəri general Şövkət Sultana istinadla yazır ki, təxminən 5 milyon insan evsiz qalmışdır.