Paris merinin köməkçisi Notr-Dam kilsəsində bərpa işlərini dərhal dayandırmağa çağırıb
Bakı, 2 dekabr, AZƏRTAC
Parisdəki Müqəddəs Məryəm ana kilsəsinin (Notr-Dam-de-Paris) 2019-cu ildə baş verən yanğın nəticəsində yanan qüllə mili yenidən Paris səmasında ucalmaq üzrə olsa da, Paris merinin səhiyyə işləri üzrə köməkçisi Enn Suiris bərpa-rekonstruksiya işlərinin dayandırılmasına çalışır. Buna səbəb qədim tikilinin mil hissəsinin üzərinin qurğuşun maddəsi ilə örtülməsidir. Onun sözlərinə görə, bu material zəhərlidir, hədd effekti mövcud deyil, daha doğrusu, hətta ən kiçik dozalarda belə toksik sayılır.
AZƏRTAC xəbər verir ki, bu barədə E.Suiris “X” sosial şəbəkəsindəki hesabında yazıb.
“Əgər indiyə qədər bu məsələ ilə bağlı ciddi qiymətləndirmə aparılmayıbsa, mən, Müqəddəs Məryəm ana kilsəsində bərpa-tikinti işlərinin dərhal dayandırılmasını xahiş edirəm. Əvvəlcə səhiyyə orqanları bu maddənin ətraf mühitə və insan sağlamlığına ciddi təsirinin olub-olmaması ilə bağlı müvafiq qərar qəbul etməlidirlər”, - deyə o, Senata ünvanladığı yazılı sorğudan sonra sosial şəbəkədəki hesabında yazıb.
E.Suirisin fikrincə, yüksək miqdarda qurğuşunun kəskin və xroniki təsiri həzmetmə prosesində pozuntulara, böyrəklərin iş fəaliyyətinin pozulmasına, sinir sisteminin zədələnməsinə və reproduktiv pozuntulara gətirib çıxara bilər. Ümumdünya Səhiyyə Təşkilatının (ÜST) məlumatına əsasən, qanda qurğuşunun aşağı miqdarı uşağın zəkasına təsir göstərə və davranış problemlərinə və təhsilin qavranılmasında çətinliklər yarada bilər. Qurğuşun üçün təhlükəlilik həddi 1 litr qanda 25 mikroqram təşkil edir.
Parisdə qurğuşundan Notr-Dam kilsəsindən başqa şəhərin kanalizasiya kanallarında, balkonların üzləndiyi boya materialında və bir çox digər yerlərdə istifadə olunub.
“Bizim Parisi yer üzündən silmək niyyətimiz yoxdur, burada çoxlu miqdarda qurğuşun var, lakin biz keçmişin səhvlərini təkrarlaya bilmərik” - deyə, E.Suiris bildirib.
Qeyd edək ki, Notr-Dam-de-Parisin açılışı bu şəhərdə keçiriləcək Yay Olimpiya Oyunlarından sonraya - 8 dekabr 2024-cü ilə planlaşdırılıb.
Bölmənin digər xəbərləri
