Paris, 27 fevral (AZƏRTAC). Fevralın 26-da Parisdəki Azərbaycan Mədəniyyəti Mərkəzində Heydər Əliyev Fondunun, Heydər Əliyev Mərkəzinin və Azərbaycanın Fransadakı səfirliyinin təşkilatçılığı ilə fransız rəssamı Reno Baltzinjerin Xocalı faciəsinə həsr etdiyi rəsm əsərlərindən ibarət “Xocalı faciəsi” sərgisinin vernisajı keçirilmişdir. Sərgidə rəsm əsərləri ilə yanaşı, qanlı faciə ilə bağlı fotolar da nümayiş etdirilmişdir.

Tədbirin açılış mərasimində Xocalı faciəsi zamanı həlak olanların xatirəsi bir dəqiqəlik sükutla yad olunmuşdur.

Sərgidə qonaqları salamlayan səfir Elçin Əmirbəyov fevralın 25-dən 26-na keçən gecə Xocalıda baş verən faciənin bütün azərbaycanlıların xatirəsindən heç vaxt silinməyəcəyini, bütün dünyanın 21 il əvvəl erməni silahlı dəstələrinin Xocalıda dinc əhaliyə qarşı törətdikləri vəhşiliklə bağlı Qarabağdan gələn xəbərlərdən şoka düşdüklərini diqqətə çəkmiş, Ermənistan-Azərbaycan, Dağlıq Qarabağ münaqişəsi zəminində törədilən soyqırımı barədə bu günədək fransız ictimaiyyəti üçün naməlum qaldığını bildirmişdir. Azərbaycanlılara qarşı etnik təmizləmə siyasəti aparan Ermənistan ölkəmizin tarixi ərazisinin 20 faizini işğal etmiş, bir milyondan artıq azərbaycanlını ata-baba yurdlarından silah gücünə çıxarmışdır. 1992-ci ildə bəşəriyyətə qarşı yönələn və silahsız Xocalı sakinlərinə qəddarcasına divan tutan silahlı erməni dəstələrinə rəhbərlik edən Serj Sərkisyan bu gün Ermənistan prezidenti kürsüsündə əyləşmişdir. Xocalıya qarşı soyqırımı aktını törədənlər ədalət məhkəməsi qarşısında dayanmalıdırlar. Beynəlxalq ictimaiyyət buna siyasi qiymət verməlidir. Xocalı soyqırımı heç zaman unudulmayacaqdır.

2008-ci ildən etibarən “Xocalıya Ədalət!” kampaniyasının keçirildiyini xatırladan səfir ədalətin zəfər çalması üçün minlərlə insanın bu kampaniyaya qoşulduğunu, bu soyqırımın tanımasının Xocalı qurbanlarının xatirəsinin anılması ilə yanaşı, gələcək nəsildə ümid yaradılmasında mühüm əhəmiyyət kəsb etdiyini bildirmişdir.

Bu faciəvi hadisələrin Meksika, Pakistan və digər ölkələr tərəfindən soyqırımı kimi tanındığını diqqətə çəkən E.Əmirbəyov Amerikanın bir çox ştatlarının Xocalı faciəsini Azərbaycan xalqına qarşı soyqırımı kimi dəyərləndirdiklərini vurğulamış, fransız siyasətçiləri tərəfindən Xocalı hadisələrinin soyqırımı kimi tanınacağına ümidvar olduğunu bəyan etmişdir.

Səfir həyatdan vaxtsız gedən Fransanın Azərbaycandakı səfirliyinin mədəniyyət məsələləri üzrə əməkdaşı Hüq Baltzinjerin Azərbaycanı Fransada tanıtmaq istəyinin qardaşı Reno Baltzinjerin tərəfindən davam etdirildiyini vurğulamışdır.

Fransada işgüzar səfərdə olan Azərbaycan Respublikasının kənd təsərrüfatı naziri İsmət Abasov demişdir: Bu gün Azərbaycan xalqının ən hüznlü, ən ağrılı günüdür. Tariximizin ən qanlı səhifələrindən biridir. Fevralın 25-dən 26-na keçən gecə erməni işğalçıları 366-cı motoatıcı alayının iştirakı ilə Azərbaycanda faciə törətmiş, Xocalı şəhərini yerlə-yeksan etmişlər.

Dünyada baş verən soyqırımları ilə müqayisədə Xocalı faciəsi ən dəhşətlisidir. Faciə zamanı Xocalının 613 dinc sakini amansızlıqla qətlə yetirilmiş, minlərlə insan əsir və girov götürülmüş, xeyli Xocalı sakini itkin düşmüşdür. Qətlə yetirilənlər arasında çoxlu sayda qadın, uşaq və qoca olmuşdur. Yüzlərlə uşaq yetim qalmışdır.

Xatırladım ki, bu ermənilərin azərbaycanlılara qarşı törətdikləri ilk soyqırımı deyildir. XX əsrdə ermənilər azərbaycanlılara qarşı dörd dəfə - 1905-1907-ci, 1918-1920-ci illərdə, 1940-cı ilin sonlarında və nəhayət əsrin sonunda xalqımıza qarşı soyqırımı təşkil etmişlər.

Azərbaycanın bəzi üzdəniraq rəhbərləri ilk vaxtlar Xocalı faciəsini xalqdan gizlətməyə, onu inkar etməyə səy göstərmiş, faciə zamanı bir neçə nəfərin yaralandığı və bir neçə nəfərin isə həlak olduğu barədə yalan məlumatlar yaymışlar. Lakin sonradan bu həqiqəti xalqdan gizlətmək mümkün olmamışdır. Soyqırımına xalqın təkidi və istəyi ilə yenidən hakimiyyətə gələn ümummilli lider Heydər Əliyevin dövründə hüquqi və siyasi qiymət verilmişdir.

Bu gün Prezident İlham Əliyev tərəfindən Xocalı soyqırımının tanıdılması istiqamətində ciddi tədbirlər görülür.

Azərbaycanın birinci xanımı, UNESCO və İSESCO-nun xoşməramlı səfiri, Heydər Əliyev Fondunun prezidenti Mehriban Əliyeva tərəfindən təhsil, səhiyyə, mədəniyyət ekologiya və s. sahələrə xüsusi qayğı göstərilməklə yanaşı, bu məsləyə də çox ciddi yanaşılır.

Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” kampaniyası dünyanın müxtəlif ölkələrində keçirilir və Xocalı faciəsini beynəlxalq ictimaiyyətə çatdırılır.

Düzgün mövqe tutmayan Ermənistan rəhbərliyi Xocalıda qeyri-qanuni hava limanını tikib istifadəyə vermək istəyir. Azərbaycan tərəfi beynəlxalq normalara tamamilə zidd olan hava limanından istifadəyə heç vaxt razı ola bilməz.

Əminəm ki, işğal altındakı torpaqlarımız tezliklə azad olunacaq və yaxın zamanlarda bu mədəniyyət mərkəzində Dağlıq Qarabağın azadlığını bayram kimi qeyd edəcək və acılı günlərimizi yaddan çıxaracağıq.

Senator Natali Qule çıxışında Azərbaycanı Fransada tanıtmaq istiqamətində Heydər Əliyev Fondu və Azərbaycan parlamenti ilə birlikdə çalışdığını, Senatda Fransa-Qafqaz Dostluq qrupunun vitse -prezidenti kimi fəaliyyət göstərdiyini, dəfələrlə ölkəmizə səfər etdiyini bildirmiş, Azərbaycan tarixini və mədəniyyətini tanıtmağın vacibliyini diqqətə çatdırmışdır.

Ermənilərin Xocalı hava limanını açmaqla növbəti təxribata əl atmaları ilə bağlı Senatda çıxış etdiyini xatırlatmış, Xocalı faciəsinin ümumbəşəri bir faciə olduğunu bildirmişdir.

Sorbon Universitetinin doktorantı Leyla Cəfərova rəssam Reno Baltzinjerin Azərbaycanın Fransadakı səfirliyində işləmiş qardaşının ölkəmizi, xalqımızı, mədəniyyətimizi hədsiz sevdiyini diqqətə çəkmiş, qardaşının Azərbaycanı Fransada tanıtmaq istəyini yerinə yetirən rəssamın Xocalı faciəsi ilə bağlı rəsm əsərləri üzərində necə işləməsindən bəhs etmişdir.

Rəssam Reno Baltzinjerin sərgidə nümayiş etdirilən tablolar üzərində iki il işlədiyini, hər bir portretin rəng seçiminə ciddi yanaşdığını, tablolardakı qırmızı rəngin Xocalı faciəsi zamanı həlak olanların rəmzi qanı fonunda verdiyini, Xocalı gecəsini öz rəsm əsərlərində canlandıran ilk fransız rəssamı olmasından məmnunluq hissi keçirdiyini diqqətə çatdırmış, sərginin nümayiş etdirilməsinə yardım göstərən Heydər Əliyev Fonduna və onun prezidenti Mehriban Əliyevaya təşəkkürünü bildirmişdir.

Sonda Xocalı faciəsi qurbanlarının xatirəsinə ehsan verilmişdir.

Əsgər Əliyev

AZƏRTAC-ın xüsusi müxbiri

Paris