Parisdə “Louis Vuitton” mağazası son 7 ayda üçüncü dəfə qarət edilib
Paris, 13 may, AZƏRTAC
Parisin 6-cı rayonunda, Sent-Jermen bulvarında “Louis Vuitton” mağazası qarət edilib.
AZƏRTAC xəbər verir ki, “Louis Vuitton” mağazası son bir il ərzində üçüncü dəfə qarət olunur. Paris vaxtı ilə səhər saat 05:30 radələrində maska geyinmiş 3 nəfər boz rəngli, üzərində yanıb-sönən mavi işıq olan “Audi” markalı avtomobillə mağazaya daxil olublar. Qarətçilərin külli miqdarda əşyanı ələ keçirdiyi bildirilir. Şübhəlilər hələ həbs olunmayıb və dəyən ziyan hələ məlum deyil.
Qeyd edək ki, mağaza ötən il sentyabrın 30-da avtomobildən istifadə olunmaqla qarət edilmişdi. Qarətçilər 4 dəqiqə ərzində mağazanın mallarının böyük bir hissəsini, eləcə də 100-dən çox dəbdəbəli əşyanı oğurlamışdılar. Oğurluq nəticəsində dəyən ziyan 900 min avro təşkil edirdi.
Ötən il noyabrın 11-də səhər saat 04:30 radələrində isə bir neçə şəxs avtomobildən istifadə edərək mağazanın pəncərəsini sındırmaqla içəri daxil olmuş və mağazanı qarət etmişdilər. Həmin zərərin miqdarının hələ müəyyən edilmədiyi bildirilir.
Bölmənin digər xəbərləri
