Pedaqoq-rəssam: İstərdim ki, azad edilmiş torpaqlarımızda sərgim açılsın
Gəncə, 25 oktyabr, Vüsalə Cənnətova, AZƏRTAC
Həyatımıza, düşüncələrimizə, əhvalımıza, sağlamlığımıza təsir edən, iç dünyamızın açarı olan rənglər... Müxtəlif çalarlı rənglərin öz dili, öz aləmi var. Bu aləmə səyahət edə bilib, onun dərinliklərini kəşf edənlər isə rəssamlardır. Əli fırçalı sənətkarlar göy qurşağının 7 rəngindən min bir çaları üzə çıxararaq, bu gözəllikləri tablolarında nümayiş etdirə bilirlər. Rəssamın yaratdığı əsərlər insan oğlunun daxili aləminin gözlə görünən təzahürünə çevrilir. Dünyaya fərqli baxıb, onu müxtəlif rənglər və duyğularla görənlərdən biri də Aynur Hüseynzadədir.
1979-cu ildə Kəlbəcər rayonunda anadan olan, Gəncə şəhərində yaşayan pedaqoq-rəssam AZƏRTAC-ın bölgə müxbirinə həyatını bağladığı sənətindən bəhs edib. O, 20 ildən çoxdur ki, müxtəlif mövzularda rəsm əsərlərinə həyat verir, fərqli materiallardan maraqlı əl işləri hazırlayır.
Aynur xanım deyir ki, indiyədək 500-ə yaxın rəsm əsəri ərsəyə gətirib. Mənəvi dünyasını, varlığını, daxilindəki hiss və duyğuları al-əlvan rənglərlə, müxtəlif kompozisiyalarla nümayiş etdirmək onu xoşbəxt edir. “Təxəyyülümün məhsulu olaraq kağızda, kartonda, kətan və divar üzərində quaş və akvarel boyalarından istifadə etməklə yaranan əsərlər fərqli mövzuları əhatə edir. Daha çox vətənpərvərliyi, milli adət-ənənələrimizi, qədim və zəngin tarixə malik xalqımızın dəyərlərini təbliğ etməyə üstünlük verirəm. Son zamanlar isə uşaqlara olan sevgimin təsiri ilə rəsm əsərlərimi onlara həsr edirəm. Onların dərin, sağ, al-əlvan, əyləncəli, sadə, bir o qədər də mürəkkəb dünyasına baş vurmağa çalışır, bu xırdalıqları rəsmlərlə üzə çıxarmağa cəhd edirəm”, - deyə həmsöhbətim bildirir.
Aynur Hüseynzadə milli mövzuda açıqcalar, eləcə də gildən, “döyülmüş kağız”, yəni papye-maşedən və digər məmulatlardan əl işləri də hazırlayır. Bu zaman kimyəvi deyil, təbii məhsullardan istifadəyə üstünlük verir. Əl işlərini ərsəyə gətirərkən milli dəyərlər, Azərbaycana məxsus simvol və ornamentlər, tarixi abidələr, ədəbiyyat, musiqi, milli bayramlar, Gəncəyə xas adətlərdən, təbiətdən ilhamlanır: “Elə olur ki, bir işin hazırlanmasına bir həftə zaman sərf edirəm. Rəsm əsərlərim, əl işlərim müxtəlif şəhər və rayonlarda təşkil olunan çoxsaylı sərgilərdə nümayiş etdirilir, yerli və əcnəbi turistlərin marağını çəkir. Onları satışını həyata keçirməklə yanaşı, hədiyyə də edirəm”.
Pedaqoq-rəssam deyir ki, məşğul olduğu sənətin ona ən çox zövq verən tərəfi öyrəndiklərini başqalarına da öyrədə bilməsidir. “İllərdir ki, uşaq incəsənət məktəbində dekorativ tətbiqi sənət, rəngkarlıq, rəsm, heykəltaraşlıq və incəsənət tarixi ilə bağlı dərs deyirəm. Yaradıcılığımda ən çox xoşladığım amil məhz uşaqlarla işləməkdir. Təsviri incəsənətin özəlliyini və gözəlliyini təbliğ etmək mənim üçün çox əhəmiyyətlidir. Bilirəm ki, sənət yolumu neçə-neçə şagirdim davam etdirir”, - deyə rəssam vurğulayır. Onun arzusu doğma yurdu Kəlbəcərdə və işğaldan azad edilmiş digər rayonlarımızdakı tarixi abidələri, mənzərəli yerləri əks etdirən rəsm əsərləri ərsəyə gətirib, onların sərgisini həmin torpaqlarda təşkil etməkdir.
Bölmənin digər xəbərləri
