“Peterburq teatr mövsümləri" festivalı: Sankt-Peterburqun ən yaxşı teatrları Bakıya gəlir
Bakı, 29 sentyabr, Tatyana İvanayeva, AZƏRTAC
Noyabrın 21-dən 26-dək Bakıda ilk dəfə olaraq Sankt-Peterburqla dünyanın digər şəhərləri və incəsənət mərkəzləri arasında mədəni əlaqələrin qurulması və inkişaf etdirilməsi üçün nəzərdə tutulan “Peterburq teatr mövsümləri” illik mədəniyyətlərarası festival keçiriləcək. Azərbaycan paytaxtında növbəti, 27-ci festivalın təşkili “Heydər Əliyev İli”nə təsadüf edir. Tədbir Sankt-Peterburqun Mədəniyyət Komitəsi və Azərbaycan Mədəniyyət Nazirliyi tərəfindən dəstəklənir.
AZƏRTAC xəbər verir ki, ənənəvi olaraq, festival çərçivəsində Sankt-Peterburq teatrlarının ən maraqlı tamaşaları nümayiş etdirilir, ictimaiyyət bu truppaların yaradıcıları ilə tanış olur.
Teatra getmək vaxt keçirmək və sənətdən həzz almaq üçün əla bir vasitədir. Festival 2007-ci ildən bəri bu deviz altında keçirilir. Belə ki, 17 il ərzində “Peterburq teatr mövsümləri” Praqa, Berlin, Təl-Əviv, Marsel, Milan, Afina və digər şəhərlərdə tamaşalar göstərib. Bu illər ərzində Aleksandrinski Teatrı, Lensovet adına Teatr, “Comedian’s Shelter”, Bolşoy Kukla Teatrı, G.A. Tovstonoqov adına BDT və bir çox başqaları festivalda iştirak ediblər.
Beləliklə, noyabr ayında Bakı üç ildən sonra “rəqəmsaldan canlı tamaşaçı auditoriyasına” keçən “Peterburq teatr mövsümləri”nə ev sahibliyi edəcək...
“Peterburq teatr mövsümləri” XVII illik mədəniyyətlərarası festival çərçivəsində Səməd Vurğun adına Azərbaycan Dövlət Akademik Rus Dram Teatrının səhnəsində müxtəlif tamaşalar nümayiş olunacaq.
Mövsüm afişası il ərzində Rusiyanın Şimal paytaxtının mədəni həyatında baş verən ən parlaq hadisələrin - müxtəlif janr və cərəyanların, tamaşaların və sərgilərin təqdimatıdır. “Peterburq teatr mövsümləri”nin repertuarı həm ənənə, həm də eksperiment dili ilə zəngindir.
Bakıda “Peterburq teatr mövsümləri” tamaşaçıların marağına səbəb olan həm klassik əsərlər, həm də müasir tamaşalar təqdim edəcək. Yaranmış festival ənənəsinə görə, balaca teatrsevərlər təkcə nağılla deyil, həm də qeyri-adi “KUKFO teatrının qəhrəmanları” sərgisi ilə tanış olacaqlar. Bu, uşaqlar və böyüklər üçün Sankt-Peterburq teatrıdır, onun repertuarında kukla formatında müxtəlif tamaşalar var. KUKFO-nun əsas yaradıcı xüsusiyyətləri rahatlıq və yumor, istehza və sağlam düşüncədir. Teatrın bədii rəhbəri Anna Viktorova deyir: “Kukla teatrında sərhəd yoxdur. Kuklaların müxtəlif idarəetmə sistemləri ola bilər, onlar kiçikdir və ovuca sığa və ya böyük ola bilər, lakin teatr səhnəsinə sığmaz, oxuya və rəqs edə, sevə və nifrət edə, şeir yaza bilər. Amma onların arxasında aktyorlar var, kukla isə skripka və ya fleyta kimi mürəkkəb alətdir. Teatrın özü isə hər bir iştirakçısının əvəzolunmaz olduğu bir orkestrdir. Çalışırıq, sınaqdan keçiririk, icad edirik, yaşayırıq və ümid edirik ki, ən yaxşı tamaşalar hələ qarşıdadır!”
“KUKFO Teatrının Qəhrəmanları” (6+) sərgisi 21-26 noyabr tarixlərində saat 18:00-dan 22:00-dək keçiriləcək.
“Peterburq teatr mövsümləri” festivalı A.N.Ostrovskinin pyesi əsasında “Comedian’s Shelter” teatrının səhnələşdirdiyi “Balzaminovun evliliyi” (16+) tamaşası ilə açılacaq. Onun rejissoru Rusiya Federasiyasının Əməkdar artisti Aleksandr İsakovdur. Tamaşanın müddəti bir fasilə ilə üç saatdır və noyabrın 21 və 22-də göstəriləcək.
Çox ağıllı olmayan, amma həddindən artıq praktik olan kiçik məmur Mixaylo Balzaminov zəngin bir gəlin xəyal edir. Uşaqlıqdan anası ona aşılayırdı ki, bu, yüksək elitaya çıxmaq üçün ən asan və etibarlı yoldur. Aleksandr Ostrovskinin ən məşhur əsərlərindən birinin süjetini bəzən heç nəyə yaramayan bir qəhrəmanın varlı gəlin tapmaqda rastlaşdığı gülməli vəziyyətlər təşkil edir. Tamaşanın hazırcavab, istehza dolu mətnindən çoxlu sitatlar gətirilib və baş qəhrəmanın macərası rahat evliliyin klassik nümunəsinə çevrilib.
Qeyd edək ki, 2023-cü ildə Rusiyada təkcə rus dramaturgiyasında deyil, həm də Azərbaycan Milli Teatrında silinməz iz qoyan Aleksandr Nikolayeviç Ostrovskinin 200 illik yubileyi qeyd olunur.
V.F. Komissarjevskaya adına Sankt-Peterburq Dövlət Akademik Dram Teatrı noyabrın 23-də Rusiya Dövlət Mükafatı laureatı Aleksandr Barqmanın quruluşunda İlqmar Vilkvistin “Qelverin gecəsi” (16+) tamaşasını təqdim edəcək. Tamaşanın fasiləsiz müddəti bir saat yarımdır.
“Qelverin gecəsi” iki nəfərin - hələ gənc olan bir qadın və onun böyütmək üçün götürdüyü inkişafdan geri qalmış 30 yaşlı oğlanın dramından bəhs edir. O, dünyaya kiçik bir uşağın gözü ilə baxır, əsgərlərlə oynamağı sevir və küçədə baş verən dəhşətli hadisələri özbaşına təkrarlayır. Qadın hər şeyini itirmiş halda gənc oğlanı xəstəxana skamyasında görərək, onun gözlərində bu vəziyyətin dəyişəcəyinə dair ümid qığılcımları görür... Tamaşa saat 19:30-da başlayır.
Noyabrın 25-də “Baltik evi” teatr-festivalında rejissor Anjey Bubenin quruluşunda “Canavarlar və qoyunlar” (16+) tamaşası təqdim olunacaq. Bu pyesin süjetinin tarixçəsi belədir: 145 il əvvəl baş vermiş əsl detektiv hekayə Aleksandr Nikolayeviç Ostrovskinin diqqətini çəkir və dramaturq 1875-ci ildə bu aktual komediyasını yazır. Tamaşa saat 19:30-da başlayır.
Festivalın kulminasiya nöqtəsi olacaq son günü - noyabrın 26-da gənc tamaşaçılara Anna Viktorovanın quruluşunda Kukla Format Teatrının təqdim etdiyi "Qırmızı çiçək" (4+) tamaşası təqdim ediləcək. Bu tamaşa saat 12:00 və 15:00-da başlayır.
Bazar günü axşam isə yenidən Aleksandr Ostrovskinin əsəri əsasında rejissor Anjey Bubenin quruluşunda “Canavarlar və qoyunlar” (16+) tamaşası təqdim olunacaq.
Bölmənin digər xəbərləri
