POLAD BÜLBÜLOĞLU RUSİYA FEDERASİYASININ YENİ ORDENİNƏ LAYİQ GÖRÜLMÜŞDÜR

03.06.2004 [23:37]
Çap et
A⁺ A^-

Azərbaycan Mədəniyyət Nazirliyindən AZƏRTAC-a bildirmişlər ki, xalq artisti, nazir Polad Bülbüloğlu Rusiya Federasiyasının Milli Xalq Mükafatına - “Yaradıcı ulduz” (Zvezda sozidaniya) ordeninə layiq görülmüşdür.

2000-ci ildə “Yaradıcı ulduz” Birliyi Azad Himayədarlar Şurasının təsis etdiyi, “yaradıcılıq, inam və ləyaqət” rəmzi olan bu ordenə indiyədək işində böyük uğurlar qazanmış dünyanın tanınmış sənət və elm adamları, görkəmli ictimai-siyasi və dövlət xadimləri layiq görülmüşlər.

50 illik yubileyi ərəfəsində, 2000-ci ildə “Yaradıcı ulduz” ordeninə layiq görülən Rusiya Federasiyasının Prezidenti Vladimir Putin bu mükafatı onun fəaliyyətinə xalqın verdiyi ən yüksək qiymət kimi dəyərləndirmişdir.

Polad Bülbüloğluna bu mükafat iyunun 30-da, Sankt-Peterburqda təqdim olunacaqdır.