Bakı, 11 oktyabr, AZƏRTAC

Azərbaycanda həyata keçirilən məqsədyönlü siyasi kurs nəticəsində ölkəmiz qısa bir müddət ərzində böyük diplomatik uğurlar əldə edib. Hazırda ölkəmizin mövqeləri qlobal siyasi sistemdə kifayət qədər sabit və güclüdür. Azərbaycan regional liderlikdən beynəlxalq siyasi mərkəzin ən vacib aktorlarından biri halına gəlib. Ölkəmizin mövqelərini gücləndirməyi həm Qərb, həm də Şərq tərəfindən etiraf edilir. Azərbaycan Avrasiya materikində vacib klid nöqtəsi kimi, Avropa və Asiya üçün əvəzedilməz yerdir.

Bu gün dünyada Prezident İlham Əliyevin nüfuzunun artmağı, əhəmiyyətli proseslərdə vacibliyi dövlətimizin mövqelərinin möhkəmlənməyi ilə müşahidə edilir. Demək olar ki, hər gün Azərbaycanın önəmi haqqında analitik yazılar yazılır, dünya mediasında hərtərəfli təhlili aparılır. Ən önəmli məsələlərdən biri isə odur ki, Azərbaycan təkcə təhlükəsizlik, siyasi və iqtisadi anlamda deyil, hazırda bəşəriyyət üçün vacib əhəmiyyətə malik bir çox parametrlər üzrə həm Avropa, həm də Asiya üçün vacib qüvvədir. Dövlətimizin başçısına həm Qərbdə, həm də Şərqdə böyük simpatiya var, onun yüksələn siyasi reytinqi Avropada da, Asiyada da maraqla qarşılanır. Dünya siyasətinin qabaqcıl simaları Prezident İlham Əliyevin uğurlarının səbəblərini təhlil edirlər. Belə ki, Prezidentimizin Bolqarıstana sonuncu səfərində nüfuzlu siyasətçilərin dili ilə bu heyranlıq bir daha ifadə edilib.

Bu fikirləri AZƏRTAC-a açıqlamasında Sosial Tədqiqatlar Mərkəzinin (STM) baş məsləhətçisi, politoloq Tural İsmayılov söyləyib.

T.İsmayılov qeyd edib ki, Azərbaycan təmsil olunduğu platformalarda dünya üçün vacib məsələlərin həllində aparıcı rolu oynayır. Ölkəmizin Qoşulmama Hərəkatında (QH) uğurlu sədrliyi dövründə Azərbaycan qlobal ədalətsizliyin aradan qaldırılması üçün vacib qərarların qəbuluna nail oldu. Azərbaycanın uğurlu sədrliyindən sonra QH vaksin milliyyətçiliyi və bir çox nizamsızlıqlara qarşı vahid mövqe nümayiş etdirdi. Dövlətimizin başçısının səyləri nəticəsində BMT-də pandemiyanın yaratdığı problemlərə həsr edilən dinləmələr keçirildi. Hərəkata üzv ölkələrin 2016-cı ildə Venesuelada keçirilmiş Zirvə Görüşündə quruma 2019-2022-ci illər üzrə sədrliyin Azərbaycana həvalə edilməsi barədə yekdil qərar qəbul edilib və “Qoşulmama Hərəkatı dövlət və hökumət başçılarının 2019-cu il oktyabrın 25-26-də Bakıda keçirilmiş 18-ci Zirvə Görüşündə quruma sədrlik Azərbaycana həvalə olunub. Ötən müddət ərzində əldə olunan uğurlar onu deməyə əsas verir ki, Azərbaycan təşkilatın sədri kimi öz missiyasını yüksək səviyyədə yerinə yetirir. Bütövlükdə QH-a üzvlükdən qısa müddət sonra respublikamızın quruma sədrlik etməsi üzv dövlətlərin Azərbaycana olan etimadının və ölkəmizin beynəlxalq nüfuzunun artmasının daha bir parlaq nümunəsidir. QH Parlament Şəbəkəsinin yaradılması da daxil olmaqla, ölkəmizin qlobal səyləri və Prezident İlham Əliyevin beynəlxalq həmrəyliyin və əməkdaşlığın möhkəmlənməsinə hesablanan təşəbbüsləri dünya ictimaiyyəti tərəfindən birmənalı dəstəklənib. Bu platformadakı uğurlu fəaliyyət Asiyadan Cənubi Amerikaya qədər qəbul edilmiş Azərbaycanın siyasi güc faktorunu bir daha göstərir.

Politoloq bildirib ki, Azərbaycanın növbəti diplomatik qələbəsi ilə müşahidə edilən Praqa görüşlərində Aİ-nin ölkəmizə verdiyi dəyəri gördük. Azərbaycan Qərbin enerji təhlükəsizliyində ən vacib faktorlardan biridir. Bolqarıstanda və Praqada dünya liderləri Azərbaycan Prezidentini pozitiv örnək kimi dəyərləndirdilər. Eyni zamanda, dövlətimizin başçısının Praqadan sonra Sankt-Peterburqa dəvət edilməsi, ardınca Qırğızıstan səfəri Asiyanın da İlham Əliyev siyasətinə olan marağını nümayiş etdirir.

“Azərbaycanın nəqliyyat sektorunda bir sıra irimiqyaslı infrastruktur layihələri həyata keçirilib. “Bakı Beynəlxalq Dəniz Ticarət Limanı” kompleksinin, müasir aeroportların, beynəlxalq əhəmiyyətli avtomobil yollarının tikintisi, “Şərq-Qərb” və “Şimal-Cənub” nəqliyyat dəhlizləri istiqamətində dəmiryol xətlərinin yenilənməsi ölkənin xarici iqtisadi əlaqələri genişlənib. Azərbaycan Avropa və Asiya arasında nəqliyyat qovşağının, kommunikasiya siyasətinin əvəzedilməz faktorudur.

Bir neçə ay öncə Bakıda Türkiyə, Azərbaycan və Qazaxıstan xarici işlər və nəqliyyat nazirlərinin ilk üçtərəfli görüşü keçirilib. Nazirlər regional əməkdaşlıq məsələlərinə və Orta Dəhlizin (Transxəzər Beynəlxalq Nəqliyyat Marşrutu) inkişaf potensialına xüsusi diqqət yetiriblər. İclasın yekununda Bakı Bəyannaməsi imzalanıb və Orta Dəhlizdən tam istifadə ilə bağlı praktiki məsələlərin həlli üçün nəqliyyat üzrə idarələrarası İşçi Qrupu yaradılıb. Nazirlərin toplantısından sonra, iyunun 29-30-da Nəqliyyat və Rabitə üzrə Azərbaycan-Türkiyə İşçi Qrupunun ilk iclası keçirilib. Tərəflər 2023-cü ildə qarşılıqlı ticarət dövriyyəsini 4,6 milyard dollardan 15 milyard dollara çatdırmağı qarşıya məqsəd qoyublar. Daşkənd şəhərində Azərbaycan, Türkiyə və Özbəkistan respublikalarının xarici işlər, ticarət, iqtisadiyyat və nəqliyyat nazirlərinin birinci üçtərəfli görüşündə xarici siyasət və regional əməkdaşlıq imkanları ilə bağlı məsələlər, üç ölkənin iqtisadiyyat, ticarət, investisiya və nəqliyyat sahələrində əməkdaşlığın həyata keçirilməsi üçün görülən işlər ətrafında fikir mübadiləsi aparılıb. Həmçinin energetika, xüsusilə bərpaolunan enerji mənbələri sahəsində əməkdaşlıq imkanları nəzərdən keçirilib. Azərbaycan, Türkiyə və Özbəkistanın yüksək tranzit potensialından daha yaxşı istifadə etmək məqsədilə beynəlxalq nəqliyyat dəhlizlərinin inkişafı üzrə əməkdaşlığın daha da möhkəmləndirilməsi imkanları müzakirə edilib. Bu xüsusda Transxəzər Beynəlxalq Şərq-Qərb Orta Dəhlizinin və bu dəhlizin bir hissəsi kimi Bakı-Tbilisi-Qars dəmir yolunun əhəmiyyəti vurğulanıb. Zəngəzur dəhlizi daxil olmaqla regionda bütün kommunikasiyaların açılmasının beynəlxalq nəqliyyat əlaqələrinin genişlənməsinə xidmət edəcəyi qeyd edilib”,- deyə STM-n baş məsləhətçisi vurğulayıb.

O əlavə edib ki, Azərbaycan Türk Dövlətləri Təşkilatının(TDT) daha da koordinə edilməsinə nail olub. Ölkəmizin güclü səyləri ilə TDT indi ən vacib təşkilatlardan biridir. Yaxın gələcəkdə isə TDT-nin inkişaf perspektivləri və dünya siyasət arenasında həlledici rola malik olacağı şübhə doğurmur.

Dünya xəritəsində indi Azərbaycan kimi dövlətlər azdır. Azərbaycanda həyata keçirilən inkişafa yönəlik siyasət nəticəsində ölkəmizin əlverişli geostrateji mövqeyini diplomatik qüdrətimizlə bütün dünyaya qəbul etdirmişik. Azərbaycan şanslıdır ki, onun həm Avropa, həm də Asiyada örnək götürülən dövlət başçısı var.