Politoloq: Azərbaycanda islahatlar sistemli və kompleks şəkildə həyata keçirilir
Bakı, 5 may, Səadət Hakıyeva, AZƏRTAC
Azərbaycanda islahatlar sistemli və kompleks şəkildə həyata keçirilir. Prezident İlham Əliyevin rəhbərliyi ilə həyata keçirilən islahatların bütün sahələri əhatə etməsi vətəndaşların ürəyincədir və gözləntiləri doğruldur. Təbii ki, vaxt ötdükcə və zaman dəyişdikcə yenilənmələrin aparılması labüd bir prosesdir. İslahatlar ölkəmizdə həyati əhəmiyyəti olan bütün sferaları- institusional, kadr, iqtisadi, siyasi, bir sözlə, bütün bloku əhatə edir. Azərbaycanın timsalında müşahidə olunan islahatlar dinamikası rasional nəticələrlə müşahidə olunur. Bu, həyatın müxtəlif sahələrində özünü büruzə verən şəffaflıq, qənaətcillik, hadisələrin ictimaiyyətə açıqlanması prosesində daha aydın görünür.
Bu fikirləri AZƏRTAC-a açıqlamasında politoloq Tofiq Abbasov söyləyib.
Politoloq bildirib ki, Azərbaycanın tarixinə islahatlar ili kimi daxil olan 2019-cu ildə bir sıra mühüm işlər görüldü. Sosial paket layihələri həyata keçirildi. 4,2 milyon insanın sosial vəziyyəti yaxşılaşdırıldı, minimum əməkhaqları, minimum pensiyalar, müavinətlər əhəmiyyətli dərəcədə artdı. Ötən il həm də qanunvericilik sahəsində dəyişikliklərlə yadda qaldı. Dövlətin əsas qanunu olan Konstitusiyada dinamikanın təmin edilməsi mühüm şərtlərdəndir və cəmiyyətin konkret hədəflərə yönəlmiş inkişaf istiqamətlərinin müəyyənləşdirilməsi zərurətindən irəli gəlir. Təbii ki, dövr, zaman dəyişdikcə, yenilənmələrə ehtiyac duyulur. Məhz bu səbəbdən Yeni Azərbaycan Partiyasının (YAP) üzvləri Prezident İlham Əliyevə müraciət edərək Milli Məclisin buraxılması ilə bağlı müraciət etdilər. 9 fevral seçkilərindən sonra Milli Məclis yeni tərkibdə formalaşdı. Parlament üzvlərinin üçdəbir hissəsini yeni seçilən deputatlar təşkil etdi. Parlamentin rəhbərliyində mühüm dəyişikliklər edildi. Müxalif partiya nümayəndələri parlament və komitə rəhbərliyində yer aldılar.
T.Abbasov hakimiyyət və müxalifət arasında yaradılan siyasi dialoqdan da danışıb: “Hakimiyyət tərəfindən irəli sürülən siyasi dialoq məfkurəsinin gücləndirilməsi yerində atılmış addımdır. Hakimiyyət mütəmadi olaraq müxalif qüvvələri dialoqa, təmasa dəvət edir, birgə müzakirələr aparmağı təklif edir. Lakin müxalifətdə vahid platforma yoxdur. Müxalifətdə müxtəlif spektri təmsil edən qüvvələr- radikallar, solçular, mötədillər var. Bu qüvvələr arasında barışmaz mövqe tutanlar çalışırlar ki, “müxalifət” sözünü özlərinin inhisarına çevirsinlər. Bu, çox yanlış addımdır. Belə qüvvələr, əslində, insanlar arasına çaşqınlıq yaradır və hərc-mərclik salmağa çalışırlar. Bunların işi yalnız və yalnız tənqid etməkdir, təklif isə yoxdur. Təbii ki, tənqid etmək asandır, işlək mexanizmləri işə salmaq isə çox çətindir.
Prezident İlham Əliyevin rəhbərliyi dövründə Azərbaycanın çox inkişaf etdiyini, ölkənin yeni imicinin formalaşdığını diqqətə çatdıran politoloq bildirib ki, Azərbaycan özünü təsdiq edən bir ölkəyə çevrilib. Azərbaycanın dünya miqyasında tanınması, nüfuzunun artması dövlət başçısının xidmətlərinin nəticəsidir.
Politoloq Azərbaycanın koronavirus pandemiyası ilə mübarizədə təcrübəsindən və digər ölkələrə örnək göstərilməsindən də bəhs edib. Diqqətə çatdırıb ki, əgər ölkəmizin ehtiyat yastığı olmasaydı, bu vəziyyətdən çıxa bilməkdə çətinlik çəkər və çox zərər görərdi. Faktdır ki, qonşu Ermənistanın anlaşılmaz, naqolay siyasət yürütməsi ona baha başa gəlir. Pandemiya dövründə bu ölkə təbii qaz üçün başqa ölkələrə yalvarmalı olur. İşğalçı ölkədə kommunal xidmətlərlə bağlı problem yaşanır. Paşinyan hökuməti isə vətəndaşlarını boş-boş vədlərlə aldadır və əslində heç bir iş görə bilmir. Çünki dövlətin buna iqtisadi gücü çatmır və ehtiyat yastığı yoxdur. Digər bir çox ölkələrdə də vəziyyət bundan yaxşı deyil. Koronavirusla mübarizə Azərbaycanın forsmajor vəziyyətə hər zaman olduğunu bir daha sübut etdi.
Politoloq pandemiya şəraitində vətəndaşların sosial rifah halının yaxşılaşdırılması istiqamətində dövlətin atdığı addımların təqdirəlayiq olduğunu vurğulayıb. Bildirib ki, dəstək proqramına əsasən, dövlət sektorunda işləyən 900 min insanın əməkhaqqı tam, 600 min özəl sektor nümayəndəsinin, o cümlədən mikrosahibkarın əməkhaqqının əhəmiyyətli hissəsi, aztəminatlı təbəqəyə aid olan 600 min insanın, o cümlədən işsizlərin və qeyri-formal məşğul olanların vəsaiti dövlət tərəfindən ödənilir. Dövlət, ictimai təşkilatlar, ilk növbədə, Heydər Əliyev Fondu, sahibkarlar, ayrı-ayrı imkanlı adamlar öz təşəbbüsləri ilə kasıb insanlara əl tuturlar. Bu istiqamətdə atılan məqsədyönlü addımlar bir daha göstərdi ki, həyata keçirilən siyasətin mərkəzində Azərbaycan vətəndaşı və onun sağlamlığı dayanır.
“Azərbaycanda hüquqi dövlət quruculuğu, Əsas Qanunun aliliyinin təmin edilməsi təmin olunur, eləcə də insan və vətəndaş hüquq və azadlıqlarının daha səmərəli müdafiə olunması istiqamətində mühüm işlər görülür. İslahatların aparıldığı bir dövrdə isə bəzi məmurların vəzifələrindən sui-istifadə etmələri hiddət doğurur. İcra başçılarının, digər mərkəzi və yerli icra orqanlarının rəhbərlərinin vəzifəsi vətəndaşa kömək göstərmək, onun problemlərinə diqqətlə yanaşmaq və həll etməkdir. İmkansız vətəndaşlar üçün nəzərdə tutulmuş ərzaq paylarını, maaşları mənimsəyənlər ən ciddi cəzaya layiqdirlər. Bu çətin dönəmdə vətəndaşa verilən ərzağı oğurlamaq, fəhlələrə nəzərdə tutulmuş maaşı mənimsəmək bağışlanmaz cinayətdir. Bu, dövlətimizin apardığı islahatlara kölgə salmaqdır, həm xalqa, həm də dövlətə xəyanətdir. Belələri müasir dövrün antipodlarıdır, buna başqa ad vermək olmaz. Son vaxtlar dörd icra başçısının cinayət başında yaxalanması, korrupsiyaya və rüşvətxorluğa görə məsuliyyətə cəlb edilməsi vətəndaşların hüquqlarının pozulmasına qarşı barışmaz mövqenin göstəricisidir. Korrupsiyaya, rüşvətxorluğa qarşı hamımız birlikdə mübarizə aparmalı, Prezidentə dəstək olmalıyıq”, - deyə politoloq qeyd edib.
Bölmənin digər xəbərləri
