Prezident İlham Əliyevin verdiyi mesajlar yeni dünya nizamının gələcəyi baxımından olduqca əhəmiyyətlidir – açıqlama
Bakı, 5 iyul, AZƏRTAC
Bakıda keçirilən Qoşulmama Hərəkatının (QH) Əlaqələndirmə Bürosunun nazirlər görüşü mühüm bir hadisədir. Çünki görüş dünyanın ən çox ehtiyac duyduğu və bu gün çox aktual olan tolerantlıq, bərabərlik və sülh mövzusuna həsr edilib. Eyni zamanda, Azərbaycanın sədrliyi nəticəsində Qoşulmama Hərəkatı bu gün dünyada səsi eşidilən və təşəbbüskar bir beynəlxalq təşkilata çevrilib. Azərbaycan Prezidenti İlham Əliyevin Qoşulmama Hərəkatına üzv olan ölkələrin nazirləri qarşısında etdiyi çıxış öz məzmunu və mahiyyəti, dünyaya verdiyi mesajlarla diqqət çəkir.
Bu fikirləri AZƏRTAC-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Hikmət Babaoğlu söyləyib.
Azərbaycan Prezidentinin dünyanın qlobal gündəmi ilə bağlı tarixi çıxış etdiyini vurğulayan deputat deyib: “Bugünkü qlobal çağırışlar kontekstində Prezident İlham Əliyevin irəli sürdüyü təklif və təşəbbüslər yeni dünya nizamının gələcəyi baxımından olduqca əhəmiyyətlidir. Azərbaycanın Qoşulmama Hərəkatına sədrlik etdiyi 3 illik müddət ərzində bu təşkilatın gördüyü işlər isə gündəmin tamamilə fərqli bir hissəsini təşkil edir.
Prezident İlham Əliyevin tədbirdəki çıxışının tarixiliyi ondadır ki, ilk növbədə, dünyada sülhün və təhlükəsizliyin pozulmasına gətirib çıxaran səbəblər cəsarətlə ortaya qoyuldu və tənqid edildi. Bu səbəblər islamofobiya, yeni imperializm və neokolonizm kimi üç qrupda təsnifatlandırıldı. İkinci mühüm məqam Azərbaycan Prezidentinin dünyanın yeni və daha ədalətli nizamı və təhlükəsizlik sisteminin formalaşmasının mümkün yolları ilə bağlı fikirlərini bildirməsi oldu. Bu, BMT və onun Təhlükəsizlik Şurasının yenidən və dünyanın siyasi coğrafiyası və sivilizasiyalarına uyğun olaraq yeni proporsiyada təşkil edilməsi, yəni Qoşulmama Hərəkatı, İƏT və digər beynəlxalq təşkilatların da BMT Təhlükəsizlik Şurasında veto hüququ ilə təmsil olunması təklifi ilə bağlıdır.
Prezident İlham Əliyevin çıxışında diqqət cəlb edən üçüncü məqam isə dünya siyasətini təyin edən ölkələrin siyasi eynəyinin islamofob və sivilizasiyaların qarşıdurması fokusundan xilas edilməsi ilə bağlı fikirləri özündə əks etdirir. Bu kontekstdə Fransanın neokolonist siyasətini tənqid edən Azərbaycan Prezidenti Fransanın kolonizm və neokolonizm siyasətini dəlil və faktlarla ifşa etdi”.
Deputat bildirib ki, dövlətimizin başçısı hazırda Azərbaycana qarşı qərəzli mövqe nümayiş etdirən Fransanın neokolonist baxışlarını və regionda sülhə qarşı olan mövqeyini dünyanın diqqətinə çatdırdı. Bu, Makron Fransanın antisülh siyasətinin üzünə vurulan tərs sillə idi. Azərbaycan Prezidentinin verdiyi ən mühüm mesajlardan biri isə Ermənistana və onu müdafiə edən antisülh blokuna ünvanlanıb. Regionda sülh istəməyən Fransa, Hindistan, İran kimi ölkələr bu xəbərdarlıqdan nəticə çıxarmalıdırlar.
“Azərbaycan Prezidenti çıxışının sonunda mümkün yeni dünya nizamında Qoşulmama Hərəkatının yeri və rolu haqqında danışaraq, gələcək nizamın ədalətli olması üçün bu hərəkatın fəal iştirakçılığı məsələsini də aktuallaşdırmış oldu. Bunun üçün isə Azərbaycanın sədrliyi dövründə Qoşulmama Hərəkatında yaradılan yeni ənənə və təşəbbüskarlıq davam etdirilməlidir”, - deyə Hikmət Babaoğlu əlavə edib.
Bölmənin digər xəbərləri
