Prezidentin müsahibəsi ötən ilin parlaq yekunu, yeni ilin dəqiq yol xəritəsi oldu
Bakı, 14 yanvar, AZƏRTAC
Prezident İlham Əliyev yanvarın 10-da yeni ilin ilk müsahibəsini yerli televiziya kanallarına verdi. Dövlətimizin başçısı bu müsahibəsində çox önəmli mesajlarla gündəm oldu. Bu da təsadüfi deyil. Əlbəttə, jurnalistlərin verdiyi sualların əksəriyyəti ictimai fikrimizin ən aparıcı mövzularını təşkil edirdi və keçmiş işğalçı Ermənistana, onun havadarlarına yönəlik idi. Nə üçün? Çünki 44 günlük müharibədən keçən 26 aya yaxın müddət göstərməkdədir ki, haqq etdiyi ağır məğlubiyyətə uğrayan Ermənistanda hələ də revanşist qüvvələr var və onlar həm rəsmi qurumlarda, həm də müxalifətdə təmsil olunurlar. Prezident İlham Əliyevin cavablarında da vurğulandığı kimi, bizi 2021-2022-ci illər içində daha bir neçə dəfə “dəmir yumruq” tətbiqinə məcbur edən Ermənistan revanşizmdən birmənalı şəkildə imtina etməlidir. Müharibə bitsə də, mübarizə hələ davam edir. Bu mübarizə az qala bütün əməli fəaliyyət sahələrini əhatələyib - siyasi-diplomatik, hərbi, iqtisadi, sosial, mədəni, mənəvi, psixoloji və sair.
Bunu AZƏRTAC-a açıqlamasında Milli Məclisin Mədəniyyət komitəsinin sədri Qənirə Paşayeva söyləyib.
Qırx dörd günlük müharibədəki şanlı Qələbədən sonra ölkəmizin nüfuzunun dünyanın dörd tərəfində yüksəldiyini və bu yüksəlişin davam etməkdə olduğunu diqqətə çatdıran Qənirə Paşayeva deyib: “Beynəlxalq platformalar, dünya siyasi elitası Azərbaycanın tarixi Zəfərini - 30 illik işğala ay yarımdan da az müddətdə son verməyimizi getdikcə daha dərindən anlayır və idrak edir, ona görə də yüksək dəyərləndirilir. Çünki qarşımızdakı yalnız “qalib ədalı cırtdan” Ermənistan deyildi. Biz faktiki olaraq dünya erməniliyinin sarıb-sarmaladığı (yaxud onları sarıb-sarmalayan) güclü himayədarları ilə mübarizədəydik. Biz açıq-gizli güclərin ikili standartlarına qarşı mübarizə aparırdıq. Biz faşizmin, terrorizmin XXI əsrdəki ən peşəkar təmsilçisi - bədnam vandalizm təcrübəsi ilə mübarizədəydik. Bizim qarşımızdakı Şər idi və Tanrı Xeyirin Zəfərini Azərbaycanın əli ilə - “Dəmir yumruq”la yerinə yetirdi. Baxmayaraq ki, o Şəri BMT Təhlükəsizlik Şurasının (TŞ) ən azı iki daimi üzvü müxtəlif forma və məzmunda davamlı müdafiə edir, qoruyur, zəruri sandıqları silahlarla ən dolama yollarla olsa belə təmin edirdi. Ona görə də İkinci Qarabağ müharibəsindən sonra əsas vəzifəmiz şanlı hərbi Qələbəmizi siyasi müstəvidə də təsdiqləmək idi. Artıq müharibədən iki il keçəndən sonra tam əminliklə demək olar ki, müharibənin nəticələri dünya tərəfindən qəbul edilib”.
Deputatın sözlərinə görə, ərazilərimizin minalardan sürət və keyfiyyətlə təmizlənməsi, abadlıq işləri, Böyük Qayıdışın ilk addımlarının atılması qürurla qeyd edəcəyimiz hadisələrdir. Qənirə Paşayeva əlavə edib: “Bu işlərin parlaq şəkildə görülməsi üçün güclü iqtisadiyyat lazım idi. “İqtisadiyyatı güclü dövlət hər şeyə qadirdir” - Ümummilli Lider Heydər Əliyevin məşhur sözlərini minnətdarlıqla xatırlayırıq. Yenə Ümummilli Liderin sözləridir: “Yol - iqtisadiyyat, mədəniyyət, bir sözlə, həyat deməkdir”. - Bu, çox sevdiyim kəlamı tez-tez işlədirəm və indi xatırlamağım da təsadüfi deyil. İqtisadiyyatımız güclü olmasa işğaldan azad etdiyimiz ərazilərimizdəki irimiqyaslı yol çəkilişlərini icra edə bilməzdik, yollar olmasa iqtisadiyyatımız inkişaf etməz. Bu iki amil bir-birini tamamlamaqdadır. İndi Qarabağda, Şərqi Zəngəzurda çəkilən yollar, o cümlədən dəmir yolları, sıfırdan qurulmuş hava limanları, qazılan uzun tunellər, tikilən körpülər iqtisadiyyatımızın mövcud gücünü və perspektivini göstərməkdədir”.
Dövlətimizin başçısının müsahibəsində yollar, nəqliyyat, kommunikasiya planında verilən mesajları diqqətə çatdıran komitə sədri deyib: “Orta Dəhliz Ermənistanı qıraqda - ənənəvi dalan mövqeyində kənarda saxlayan bir layihədir. Orta Dəhliz istiqamətində ardıcıl siyasət aparılır. Beş il bundan əvvəl Bakı-Tbilisi-Qars dəmir yolunun açılışı oldu. Bu layihənin təşəbbüskarı da biz olmuşuq və bu layihənin icrası çox çəkdi. Biz bu dəmir yolunun ötürmə qabiliyyətini indiki 1 milyon tondan 5 milyon tona qədər çatdıracağıq. Nəzərə alsaq ki, gələn ay bir ili tamam olacaq Rusiya-Ukrayna müharibəsinin irimiqyaslı fəsadları beynəlxalq nəqliyyat əlaqələri sahəsində də problemlər və zəruri yerdəyişmə arayışları yaradıb, ona görə Orta Asiyadan Avropaya daşınan yüklər üçün yeni yol layihələrinin önəmi fövqəladə dərəcədə artırıb. “Xəzər üzərindən keçən yol vaxt baxımından çox cəlbedicidir”. Ölkəmizin vacib Bakı-Yalama xətti, ardınca Ələt-Astara xətti də çağdaş standartlar səviyyəsinə gətiriləcəkdir. Təkcə Şimal-Cənub nəqliyyat dəhlizi ilə Azərbaycan ərazisindən mərhələli qaydada 15 milyon tondan 30 milyon tona qədər yük daşına bilər. Ona görə Şimal-Cənub nəqliyyat dəhlizi Orta Dəhlizlə rəqabət apara biləcək layihədir. Nəhayət ən ümdəsi, ölkəmiz Zəngəzur dəhlizi terminini artıq geosiyasi leksikona daxil edə bilib. Bizim üçün bu layihə təkcə iqtisadi və nəqliyyat layihəsi deyil, bu, bizim üçün strateji bir layihədir. Bu layihənin reallaşması bizim təbii hüququmuzdur. Bu layihənin reallaşması, eyni zamanda, 2020-ci il 10 noyabr tarixli üçtərəfli Bəyanatında da öz əksini tapıb. Orada açıq-aydın göstərilir ki, Azərbaycanın qərb rayonları ilə Naxçıvan Muxtar Respublikası arasında nəqliyyat bağlantısı olmalıdır və Ermənistan bunu təmin etməlidir”.
Komitə sədrinin sözlərinə görə, Zəngəzur dəhlizindən danışılırsa, o bir termin olaraq artıq geosiyasi leksikona daxil edilib. O zaman Qərbi Azərbaycan mövzusunu beynəlxalq arenaya çıxardığımızı da bu yerdə vurğulamalıyıq: “Bu yöndə işlər konseptual əsasda aparılmalıdır, aparılır və aparılacaq. Necə ki, vaxtilə Qarabağ mövzusu bütün Azərbaycan xalqını birləşdirdi və biz istəyimizə nail olduq, eyni yanaşmanı Qərbi Azərbaycan mövzusunda da görməliyik. Dövlətimiz bütün proqramları lazımi qaydada icra edir və Prezidentin “Biz heç vaxt reallaşması mümkün olmayan təşəbbüslərlə çıxış etmirik” sözləri dəfələrlə sübut olunub”.
Bölmənin digər xəbərləri
