Vladivostok, 19 sentyabr, AZƏRTAC

Rusiyanın Primorsk vilayətinin Vladivostok şəhərində Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş təntənəli tədbir keçirilib.

AZƏRTAC xəbər verir ki, “Azərbaycan Konqresi” Primoriye diyarı Milli-Mədəni Təşkilatinin təşkil etdiyi tədbirdə Primorsk diyarının qubernatoru, şəhər meriyasının, ictimaiyyətin, diaspor nümayəndələri iştirak ediblər.

Primorsk Filarmoniyasının foyesində Ümummilli Lider Heydər Əliyevin Rusiyanın görkəmli şəxsiyyətləri, eləcə də Baykal-Amur magistralının tikintisində iştirak edən inşaatçılar ilə görüşlərini əks etdirən fotosərgi təşkil olunub, Ulu Öndərin şərəfli ömür yolundan bəhs edən film nümayiş etdirilib.

Primorsk diyarının qubernatoru Oleq Kojemyako tədbirdə çıxış edərək Ulu Öndər Heydər Əliyevin Rusiya-Azərbaycan münasibətlərinin inkişafında xidmətlərindən danışıb. Qubernator görkəmli dövlət xadimi Heydər Əliyevin Baykal-Amur magistralının inşasında xüsusi rolunu vurğulayıb.

“Azərbaycan Konqresi” Milli-Mədəni Təşkilatının sədri Mərdan Novruzov, Marinski teatrının Primorsk səhnəsinin bədii rəhbəri Eldar Əliyev və başqaları Ümummilli Lider Heydər Əliyevin müasir Azərbaycan dövlətinin yaradılması və inkişafında, Azərbaycan-Rusiya strateji əməkdaşlıq münasibətlərinin formalaşmasında müstəsna xidmətlərindən danışıblar.

Vladivostok administrasiyası rəhbərinin müavini Darya Steqniy Rusiya ilə Azərbaycan arasında mədəni və humanitar əlaqələrin inkişafında Heydər Əliyevin əvəzsiz xidmətlərindən söz açıb. O, görkəmli dövlət xadimi Heydər Əliyevin yubileyi münasibəti ilə təşkil olunmuş təntənəli tədbirin Primorskda yaşayan azərbaycanlılar üçün deyil, şəhərin bütün sakinləri üçün yaddaqalan hadisə olduğunu vurğulayıb.

Diasporla İş üzrə Dövlət Komitənin nümayəndəsi Tural Səfərov, Azərbaycanın Yekaterinburqdakı vitse-konsulu Elnur Novruzov SSRİ-də həyata keçirilmiş bir çox nəhəng layihələrin Heydər Əliyevin adı ilə bağlı olduğunu vurğulayıblar.

Tədbir azərbaycanlı müğənnilərin ifasında konsert proqramı ilə davam edib.

Fəridə Abdullayeva

AZƏRTAC-ın xüsusi müxbiri

Vladivostok