Professor: Azərbaycan Prezidenti yeni dövr üçün strateji hədəfləri açıqladı
Bakı, 26 sentyabr, AZƏRTAC
Prezident İlham Əliyevin Milli Məclisin ilk iclasında iştirak edərək proqram xarakterli tövsiyələrini verməsi parlamentin tarixində ənənəvi hal alıb. Yeni formalaşmış parlamentin işinə uğurlar arzulayan Prezident Milli Məclisin və deputatların öz işi ilə ölkəmizin hərtərəfli inkişafına töhfə verəcəyinə əmin olduğunu bildirdi. O, builki prezident və parlament seçkilərinin müstəqil ölkəmizin tarixində ilk dəfə bütün ərazilərimizdə keçirildiyini vurğuladı. Prezidentin çıxışı ölkəmizin gələcəyi, qarşıda duran vəzifələr, hədəflərlə bağlı mühüm yol xəritəsi idi.
Bu fikirləri AZƏRTAC-a açıqlamasında Azərbaycan Dövlət Pedaqoji Universitetinin Analitik və üzvi kimya kafedrasının müdiri professor Əli Zalov söyləyib. O bildirib ki, dövlətimizin başçısı II Qarabağ müharibəsi və suverenliyimizin tam bərpa edilməsindən sonra yaranmış yeni reallığı dünya miqyasında tarixi hadisə kimi səciyyələndirdi. Diqqətə çatdırdı ki, Azərbaycan xalqının birliyi, iradəsi, dövlətin gücü Qələbənin əsasını təşkil etdi. Bu sahədə başlıca amil milli təhlükəsizliyin təmin edilməsidir. Dövlətimizin hərbi qüdrətinin artırılması bu mənada xüsusi önəm kəsb edir. Ölkəmizin hərbi gücü olmasa, heç bir müstəvidə uğuru təmin etmək mümkün olmaz. Ermənistanda revanşizm meyilləri bu sahəyə daim diqqət göstərməyə vadar edir.
“Prezidentin bu sahəyə diqqət çəkməsi, sözsüz ki, qarşıya yeni vəzifələr qoymaqla yanaşı, hər kəs üçün də vacib bir mesaj hesab edilir. Azərbaycanın öz hərbi gücünü artırması, silahlı birləşmələrin yaradılması, yeni xüsusi təyinatlı qüvvələrin, komanda qüvvələrinin, digər xüsusi təyinatlı silahlı birləşmələrin yaradılması ölkəmizin təhlükəsizliyinin və sülhün təmin edilməsində mühüm amildir”,- deyə professor əlavə edib.
“Prezident çıxışında Azərbaycana qarşı ideoloji təxribatların davam etdiyini bildirdi. Bu kimi təxribatlara qarşı xalqımızın güclü iradəsi və milli ruhu sayəsində lazımi cavab verildiyi də məlumdur. Bu mənada Azərbaycanın gələcək inkişafının əsas təminatçısı olan gənc nəslin milli ruhda böyüməsi olduqca önəmli faktordur. Ölkəmiz beynəlxalq ictimaiyyətin dəstəyini qazanmış ən etibarlı tərəfdaşdır. Bunun bariz nümunəsi COP29-un Azərbaycanda keçirilməsidir. İki yüzə yaxın ölkə tərəfindən qəbul edilmiş bu tarixi qərar Azərbaycanın beynəlxalq nüfuzunun, hörmətinin göstəricisidir. Bu gün ölkəmizin bütün qitələrdə dostlarının sayı artır. Prezidentin də dediyi kimi, VII çağırış Milli Məclis və onun deputatları öz işi ilə ölkəmizin hərtərəfli inkişafına töhfə verəcək və Azərbaycanın dayanıqlı inkişafı təmin ediləcək”, - deyə Ə.Zalov fikrini yekunlaşdırıb.
Bölmənin digər xəbərləri
