“Qafqaz İslam Ordusu və Bakının qurtuluşu-100” mövzusunda konfrans keçirilib
Bakı, 13 sentyabr, AZƏRTAC
Sentyabrın 13-də Azərbaycanlıların və digər Türkdilli Xalqların Əməkdaşlıq Mərkəzi (ATXƏM) və İstanbul Türkiyə-Azərbaycan Həmrəylik və Mədəniyyət Dərnəyinin (İSTAD) təşkilatçılığı, Mətbuat Şurası və Milli QHT Forumunun, "Avrasiya Beynəlxalq Araşdırmalar İnstitutu" İctimai Birliyinin dəstəyi ilə Bakının erməni-bolşevik işğalçılarından azad olunmasının 100 illiyinə həsr edilən “Qafqaz İslam Ordusu və Bakının qurtuluşu-100” mövzusunda konfrans keçirilib.
AZƏRTAC xəbər verir ki, tədbiri giriş sözü ilə açan ATXƏM-in sədri İlham İsmayılov 1918-ci ildə Azərbaycan Xalq Cümhuriyyətinin ən ağır vaxtlarında Azərbaycana qardaş köməyinə gəlmiş Qafqaz İslam Ordusunun xilaskarlıq missiyası barədə danışıb. O bildirib ki, Azərbaycan-Türkiyə münasibətləri hər zaman dünyaya örnək olub.
Milli Məclisin deputatı, “Avrasiya Beynəlxalq Araşdırmalar İnstitutu” İctimai Birliyinin sədri Qənirə Paşayeva bildirib ki, zamanında Azərbaycanı qurtarmağı qardaşlıq borcu bilən qəhrəman Nuru Paşaya mənəvi borcumuzu vermək həm də bir vicdan borcudur. “Qafqaz İslam Ordusu Azərbaycana gəlib, Azərbaycanın igid oğulları ilə birlikdə Bakını erməni-bolşeviklərdən xilas etdilər. Biz həmişə onların ruhları qarşısında baş əyir, xatirələrini dərin hörmətlə anırıq. Bu, Türkiyə-Azərbaycan qardaşlığının ən bariz nümunəsidir”.
Türkiyənin Azərbaycandakı səfirinin birinci müavini Volkan Özkiper bildirib ki, 1918-ci ildə baş vermiş bu hadisəni qeyd etməyimiz bizim üçün çox önəmlidir. 1915-ci ildə Çanaqqala döyüşündə türklərlə bərabər azərbaycanlı qardaşlarımız da şəhid olub. Üç il sonra - 1918-ci ildə azərbaycanlı qardaşlarımıza kömək lazım olduqda heç düşünmədən bu köməyi etdik. Tarixboyu azərbaycanlı qardaşlarımıza kömək lazım olanda müraciət gözləməmişik. Dostluğumuz, qardaşlığımız 100 illər keçsə də, davam edəcək və daha da güclənəcək. Biz bu münasibətlərin güclənməsi üçün hər bir sahədə əlimizdən gələni etməyə hazırıq.
Milli Məclisin deputatı, Azərbaycan Mətbuat Şurasının sədri Əflatun Amaşov da 15 sentyabr tarixinin əhəmiyyətindən danışıb və bu günü bayram kimi xarakterizə edib. O, Azərbaycan və Türkiyənin çətin günlərdə bir-birinə yardım etdiyini deyib və qarşılıqlı münasibətlərin hər ötən gün daha da inkişaf etdiyini diqqətə çatdırıb.
Tədbirdə çıxış edən İSTAD-ın sədri Səfər Qaraqoyunlu bildirib ki, 1918-ci ildə Azərbaycan böyük çətinliklər yaşayıb. Həmin illərdə Qafqaz İslam Ordusu Azərbaycana köməyə gəldi. Əgər bu gün biz Bakının azad olunmasını qeyd ediriksə, bunu o zamankı türk və Azərbaycan əsgərlərinə borcluyuq. Bu gün də Azərbaycan-Türkiyə qardaşlığı davam edir. Ölkələrimiz hər zaman bir-birinə dəstək olur. Azərbaycan-Türkiyə qardaşlığı tarixə qızıl hərflərlə yazılıb.
Milli QHT Forumunun sədri Rauf Zeyni və başqaları çıxışlarında 15 sentyabr tarixinin əhəmiyyəti, Türkiyə-Azərbaycan dostluq və qardaşlıq münasibətlərindən bəhs ediblər.
Sonra tarixçi alimlər Anar İsgəndərov və Nəsiman Yaqublu tədbir iştirakçılarına 1918-ci ildə erməni-bolşevik dəstələrinin Azərbaycanda törətdiyi qırğınlardan, Qafqaz İslam Ordusunun xalqımızı bu çətin vəziyyətdən xilas etməsindən söhbət açıblar.
Bölmənin digər xəbərləri
