Qanları ilə şanlı tarix yazan gənclərimiz şərəfli missiyanı uğurla yerinə yetirdilər
Qazax, 26 sentyabr, Ruslan Novruzoğlu, AZƏRTAC
Qazaxda 27 Sentyabr – Anım Gününə həsr olunmuş “Xalq-Dövlət-Ordu birliyində birləşən Dəmir yumruq” mövzusunda tədbir keçirilib.
AZƏRTAC-ın bölgə müxbirinin məlumatına görə, tədbirdə əvvəlcə dərnək üzvlərinin rəsmlərindən ibarət sərgi nümayiş etdirilib.
Tədbir Dövlət Himninin səsləndirilməsi ilə başlayıb. Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib. Sonra 44 günlük Vətən müharibəsinə həsr edilmiş film nümayiş olunub.
Qazax Rayon Heydər Əliyev Mərkəzinin direktoru Ceyhunə Hüseynova çıxışında bildirib ki, 27 Sentyabr xalqımızın milli birliyinin və qəhrəmanlıq salnaməsinin tərənnümüdür. Qeyd olunub ki, torpaqlarımız qəhrəman şəhidlərimizin, əsgər və zabitlərimizin, qazilərimizin qanı-canı bahasına işğaldan azad edilib. Qanları ilə şanlı tarix yazan gənclərimiz şərəfli missiyanı uğurla yerinə yetirdilər. Xalqımız hər zaman mübariz oğullarının şücaətini yüksək qiymətləndirir, şəhidlərimizin xatirəsini uca tutur. Qazax rayonunda da silsilə anım tədbirləri təşkil olunub, şəhidlərin məzarları ziyarət edilir, şəhid ailələri və Vətən müharibəsi qaziləri ilə görüşlər keçirilir. Bu gün hər bir azərbaycanlı Anım Gününü qürurla qeyd edir. Xalqımız dövlətinin və Prezident İlham Əliyevin ətrafında “Dəmir yumruq” kimi birləşərək daha böyük zirvələrə doğru inamla irəliləyir.
Rayon Uşaq-Gənclər İnkişaf Mərkəzinin dərnək üzvləri şəhidlərə həsr olunan şeirlər səsləndiriblər. Tədbirdə iştirak edən şəhid övladları ürək sözlərini bölüşüblər. Vətən müharibəsi şəhidi, ölümündən sonra 3-cü dərəcəli “Vətənə xidmətə görə” ordeni, "Vətən uğrunda”, "Cəbrayılın azad olunmasına görə”, "Füzulinin azad olunmasına görə”, “Cəsur döyüşçü” medalları ilə təltif olunmuş, Sofulu kəndinin igid oğlu gizir İsmayılov Tahir Niyazi oğlunun övladları Niyazi və Uğur İsmayılovlara, Vətən müharibəsi şəhidi, ölümündən sonra 3-cü dərəcəli “Rəşadət” ordeni, "Vətən uğrunda”, “Suqovuşanın azad olunmasına görə” medalları ilə təltif olunmuş, Aşağı Əskipara kəndinin igid oğlu kapitan İsmayılov İmamverdi Yoloğlu oğlunun övladı Emin İsmayılova, Vətən müharibəsi şəhidi Nurlan Məmmədovun övladları Nuray və Məmməd Məmmədovlara, Vətən müharibəsi şəhidi Natiq Şıxməmmədovun övladı Gülay Şıxməmmədovaya Qazax Rayon Uşaq-Gənclər İnkişaf Mərkəzi tərəfindən hədiyyələr təqdim edilib.
Bölmənin digər xəbərləri
