Qanlı Yanvar heç zaman yaddan çıxmayacaq
Bakı, 19 yanvar, AZƏRTAC
Təhsil İşçilərinin Peşəkar İnkişafı İnstitutunda “20 Yanvar - müstəqilliyə gedən yol” mövzusunda elmi-praktik konfrans keçirilib.
Əvvəlcə şəhidlərin əziz xatirəsi bir dəqiqəlik sükutla yad edilib.
İnstitutdan AZƏRTAC-a bildiriblər ki, tədbirdə bu təhsil müəssisəsinin rektoru, professor Asəf Zamanov 20 Yanvar faciəsindən bəhs edib, 1990-cı il yanvarın 19-dan 20-nə keçən gecə keçmiş sovet ordusunun ölkəmizdə günahsız qanlar tökdüyünü, qadınları, uşaqları, qocaları, gəncləri vəhşicəsinə qətlə yetirdiyini diqqətə çatdırıb.
20 Yanvarın Azərbaycanın müstəqillik tarixindəki yerindən danışan A.Zamanov şəhidlərin xatirəsinin ürəklərdə zaman-zaman yaşayacağını söyləyib.
Rektor ulu öndər Heydər Əliyevin təşəbbüsü ilə 20 Yanvara siyasi-hüquqi qiymət verildiyini bildirib.
Konfransda Binəqədi Rayon Ziyalılar Cəmiyyəti idarə heyətinin üzvü Taleh Həmid və professor Hüseyn Əsgərovun 20 Yanvarla bağlı məruzələri dinlənilib, Qanlı Yanvarın heç zaman yaddan çıxmayacağı vurğulanıb.
Bölmənin digər xəbərləri
