Qanlı Yanvarda şəhid olan Vətən övladları Azərbaycanın tarixinə parlaq səhifə yazıblar
Bakı, 20 yanvar, AZƏRTAC
Qanlı Yanvarda şəhid olan Vətən övladları Azərbaycanın müasir tarixinə parlaq səhifə yazıb, xalqın azadlığı, müstəqilliyi üçün yol açıblar.
Bu sözləri AZƏRTAC-a müsahibəsində Şəhidlər xiyabanını ziyarət etmək üçün Naxçıvan şəhərindən bu müqəddəs məkana gələn təqaüdçü Elsəvər Əhmədov deyib.
E.Əhmədov deyib: “Ölkəmizin azadlığı, müstəqilliyi və ərazi bütövlüyü uğrunda mübarizədə şəhid olmuş Vətən övladları hər zaman bizim qəlbimizdədir. Bu gün xalqımızın ən ağır günlərindən biridir. Şəhidlərimizin xatirəsini yad etməyə gəlmişik. Nəvəmi də özümlə gətirmişəm. Qoy o da bilsin ki, bu insanlar bizim müstəqilliyimiz uğrunda canlarını qurban veriblər, şəhidlik zirvəsinə yüksəliblər. Minlərlə vətəndaşımızın ölkənin bütün şəhər və kəndlərindən axışaraq Şəhidlər xiyabanını ziyarət etməsi xalqın öz qəhrəmanlarının əziz xatirəsinə dərin ehtiramıdır. Biz 20 Yanvarı milli matəm, hüzn kimi qeyd edirik, həm də o müdhiş gecəni iftixar hissi ilə xatırlayırıq. Allahdan bütün şəhidlərimizə rəhmət diləyirəm”.
Bölmənin digər xəbərləri
