“Qarabağ”–“Çelsi” oyununun biletlərinin qanunsuz satışı ilə bağlı araşdırma aparılır
Bakı, 3 noyabr, AZƏRTAC
“Qarabağ”–“Çelsi” oyununun biletlərinin sosial şəbəkələrdə yüksək qiymətlərlə satışa çıxarılması məsələsi klubumuzun və hüquq-mühafizə orqanlarının diqqət mərkəzindədir.
Bu barədə AZƏRTAC-a açıqlamasında “Qarabağ” klubunun mətbuat katibi Anar Hacıyev məlumat verib.
O, UEFA Çempionlar Liqasının əsas mərhələsinin IV turunda “Çelsi” ilə Bakıda keçiriləcək matçın qanunsuz bilet satışı ilə bağlı araşdırmaların aparılacağını bildirib.
Daxili İşlər Nazirliyinin (DİN) Mətbuat xidmətinin əməkdaşı Cəsarət Qənbərli isə AZƏRTAC-ın sorğusuna cavab olaraq qeyd edib ki, polis əməkdaşları tərəfindən bu barədə qanunamüvafiq tədbirlərin görülməsi təmin ediləcək: “Qanunsuz bilet satışı ilə bağlı çevik reaksiya verilməklə hər bir məlumat yoxlanılacaq”.
"iTickets.az" saytından isə oyunun biletlərinin alışı zamanı yaranan çətinliklə bağlı AZƏRTAC-a bildirilib ki, biletlər satışa çıxarıldıqdan dərhal sonra saytda ciddi yüklənmə olub və 25 min nəfərlik onlayn növbə yaranıb: "Nəticədə biletlər növbəli şəkildə satılıb. Həmin vaxt yalnız 75 manatlıq və VİP sektorlar üçün biletlər əlçatan olub".
Qeyd edək ki, noyabrın 5-də Tofiq Bəhramov adına Respublika Stadionunda keçiriləcək “Qarabağ”–“Çelsi” görüşü saat 21:45-də başlayacaq.
Bölmənin digər xəbərləri
