Qarabağda tədbirlər silsiləsi - “Mədəniyyət rüzgarı”
Bakı, 15 oktyabr, AZƏRTAC
İşğaldan azad olunmuş Qarabağda dövlətimiz tərəfindən genişmiqyaslı bərpa-quruculuq işləri həyata keçirilir, keçmiş məcburi köçkünlərin mərhələli şəkildə doğma yurda qayıdışı təmin edilir. Sürətlə dirçəldilən torpaqlarda mədəni mühitin bərpası da diqqətdə saxlanılır.
Mədəniyyət Nazirliyi Mədəniyyət üzrə Elmi-Metodiki və İxtisasartırma Mərkəzinin (MEMİM) təşkilatçılığı və Qarabağ Regional Mədəniyyət İdarəsinin dəstəyi ilə oktyabrın 20-dən 31-dək Qarabağ bölgəsində “Mədəniyyət rüzgarı” adı altında silsilə tədbirlər keçiriləcək.
Mərkəzdən AZƏRTAC-a bildirilib ki, özündə mədəniyyətin bir neçə sahəsi üzrə tədbirləri birləşdirən layihə Qarabağ bölgəsinin 5 şəhərini (Ağdam, Ağcabədi, Bərdə, Füzuli və Xankəndi) əhatə edəcək.
MEMİM-in “Sənətkarın dostu” layihəsi üzrə oktyabrın 20-də Qarabağ Universiteti İncəsənət fakültəsinin dəstəyi ilə bu təhsil ocağında xanəndə, pedaqoq, Əməkdar incəsənət xadimi Aqil Məlikovla görüş, oktyabrın 21-də isə “Azərbaycan mədəniyyətində Üzeyir Hacıbəyli fenomeni” mövzusunda elmi-praktik seminar keçiriləcək. Tədbir dahi bəstəkar, Azərbaycan professional musiqisinin banisi, musiqişünas və pedaqoq Üzeyir Hacıbəylinin 140 illik yubileyi münasibətilə gerçəkləşəcək.
Oktyabrın 20-25-də Ağdam Dövlət Dram Teatrında, 26-31-də isə Füzuli Dövlət Dram Teatrında “Regionlarda peşəkar teatr dərsləri” adlı silsilə tədbirlər keçiriləcək.
Oktyabrın 27-də Bərdə rayon Mədəniyyət Mərkəzində kitabxana əməkdaşları üçün təlim təşkil ediləcək.
“Mədəniyyət rüzgarı” çərçivəsində silsilə ustad dərsləri də nəzərdə tutulur. Oktyabrın 27-də Bərdə şəhər 1 nömrəli uşaq incəsənət məktəbində Xalq artisti professor Zəhra Quliyevanın iştirakı ilə violin, oktyabrın 28-də isə Üzeyir Hacıbəyli adına Ağcabədi şəhər Qarabağ Muğam Mərkəzində Əməkdar artist Neymət Mürsəlovun iştirakı ilə tar, sənətşünaslıq üzrə fəlsəfə doktoru Nərgiz Kəngərli tərəfindən fortepiano ixtisası üzrə ustad dərsləri keçiriləcək.
“Sənətkarın dostu” layihəsi çərçivəsində növbəti görüş oktyabrın 29-da Füzuli şəhərindəki Kurmanqazı adına Uşaq Yaradıcılıq Mərkəzində Xalq artisti, xanəndə, pedaqoq Mənsum İbrahimovun iştirakı ilə reallaşacaq.
Xatırladaq ki, MEMİM-in təşkilatçılığı ilə “Mədəniyyət rüzgarı” adlı ilk silsilə tədbirlər bu il aprelin 8-12-də Gəncə şəhərində keçirilib.
Bölmənin digər xəbərləri
