Qardaşlığın yeni erası: Getdikcə möhkəmlənən Azərbaycan-Pakistan münasibətləri - ŞƏRH
Bakı, 14 iyul, AZƏRTAC
Azərbaycan Prezidenti İlham Əliyevin Pakistana dövlət səfəri tarixi xarakter daşıyır. Bu səfər iki ölkə arasındakı qardaşlığa əsaslanan sıx əlaqələrin yeni erasının başlanğıcı oldu.
Bu sözləri AZƏRTAC-a açıqlamasında Pakistan-Azərbaycan Məzunları Birliyinin qurucusu, strateji kommunikasiyalar üzrə pakistanlı ekspert Qayser Nəvvab söyləyib.
Azərbaycan ilə Pakistan arasında möhkəm qardaşlıq əlaqələrinin hər iki ölkənin iqtisadi inkişafına mühüm töhfə verdiyini vurğulayan ekspert bildirib: “Prezident İlham Əliyevin səfəri ilə bağlı diqqətçəkən məqamlardan biri ölkələrimiz arasında ikitərəfli investisiyanın həcminin 2 milyard dollara yüksəldilməsi barədə razılaşmanın əldə edilməsidir. Pakistanın Baş naziri Şahbaz Şərifin mətbuata bəyanat zamanı ifadə etdiyi bu öhdəlik qarşılıqlı inkişaf üçün imkanlar vəd edir. Baş nazir bu ilkin rəqəmin başlanğıc olacağına ümid etdiyini bildirərək cari ilin payızında Azərbaycana gözlənilən səfəri zamanı mühüm sazişlərin imzalanacağından əminliyini ifadə edib. “Hazırda dəyəri 100 milyon dollardan az olan ikitərəfli investisiyanın həcmi qardaşlığımızın və dostluğumuzun gücünü əks etdirmir”, - deyə qeyd edən Ş.Şərif əməkdaşlığımızı təkcə ümumi dəyərlərimizin təzahürü kimi deyil, həm də iqtisadi tərəqqiyə doğru strateji addım kimi dəyərləndirib”.
Prezident İlham Əliyevin səfər çərçivəsində İslamabadda Milli Aerokosmik Elm və Texnologiya Parkı ilə tanışlığının müdafiə sektorunda strateji tərəfdaşlıq üçün yeni yollar açdığını, ölkələrimizin imkanlarını artırdığını və innovasiyaları təşviq etdiyini diqqətə çatdıran ekspert, həmçinin deyib: “Azərbaycan Prezidenti ilə görüşü zamanı ölkələrimiz arasında siyasi əlaqələrin yüksək səviyyəsindən məmnunluğunu ifadə edən Pakistan Prezidenti Asif Əli Zərdari iki ölkənin hər zaman bir-birinə qarşılıqlı dəstək göstərdiklərini xatırladıb. Elmi və texnoloji əməkdaşlıq haqqında razılaşmalar isə innovasiya və tədqiqat sahəsini inkişaf etdirərək, yeni iqtisadi imkanlar yaratmağı hədəfləyir. Azərbaycanla Pakistan arasında əməkdaşlığın şaxələndirilməsi Azərbaycanın regional iqtisadi inteqrasiyada rolunu gücləndirir. Bu əlaqələr Türk dövlətləri üçün də sabitlik və iqtisadi inkişafı təşviq etmək baxımından önəmlidir”.
Qayser Nəvvab vurğulayıb ki, xalqlarımız arasında əsl qardaşlıq, etimad və səmimiyyət üzərində qurulmuş köklü əlaqələri daha da dərinləşdirməyin əsl məqamıdır. Xüsusilə də iki ölkənin gəncləri arasında əlaqələri gücləndirməklə çox şeyə nail olmaq mümkündür.
“Düşünürəm ki, Pakistan və Azərbaycanın 2024-cü ilin noyabrında Bakıda keçiriləcək COP29 tədbiri ərəfəsində “İqlim diplomatiyası qardaşlığı ili” elan etməsi məqsədəuyğun olardı. Gənc liderlər və gənc nəsil arasındakı dostluq əlaqələrimizi davam etdirmək onları daha da gücləndirmək üçün mühüm əhəmiyyət daşıyır. Gənclər bütün sahələrdə fəallıq nümayiş etdirirlər, onların qarşılıqlı inam və hörmətə əsaslanan sıx əməkdaşlığa çox ehtiyacı var. Bütün sahələrdə birgə əməkdaşlığımız üçün imkanlarımız böyükdür.
Azərbaycanın ev sahibliyi edəcəyi COP29 iqlim sammiti hər iki xalq üçün əlamətdar hadisədir. Pakistanın Baş nazirinin qeyd etdiyi kimi, Prezident İlham Əliyevin rəhbərliyi ilə COP29 inkişaf etməkdə olan ölkələrin, o cümlədən Pakistanın üzləşdiyi iqlimlə bağlı problemlərin səmərəli şəkildə həllinə töhfə verəcək. Mən bu tədbiri gənclərin səslərini çatdırmaq və iqlim dəyişikliyi ilə mübarizə üçün davamlı həll yollarını müdafiə etmək üçün mühüm fürsət kimi görürəm”, - deyə ekspert vurğulayıb.
O, həmçinin deyib ki, Prezident Əliyevin kəşmirlilərin hüquqlarını müdafiə etməsi, beynəlxalq hüquqa və ədalətə sadiqliyi hər iki xalqın dəstəklədiyi prinsiplərlə səsləşir.
“Enerji, əlaqə, infrastruktur və müdafiə sənayesi layihələri üzrə müzakirələr, birgə sərmayələrlə bağlı danışıqlar Azərbaycanın və Pakistanın birlikdə irəlilədikləri uğurlu gələcəyə yol açır. Azərbaycan Prezidenti İlham Əliyevin Pakistana dövlət səfəri sayəsində diplomatik əlaqələrimizin möhkəmləndirilməsi ilə yanaşı, iqtisadi və strateji əməkdaşlığın dərinləşdirilməsi istiqamətində də yeni səhifələr açılıb. Qardaşlar olaraq indi və əbədi şəkildə bir-birimizi dəstəkləməyə, daha parlaq sabahlara doğru irəliləməyə davam edəcəyik”, - deyə Qayser Nəvvab fikirlərini yekunlaşdırıb.
Bölmənin digər xəbərləri
