QARŞILIQLI FAYDALI ƏMƏKDAŞLIQENERJİ MÜBADİLƏSİNİN HƏCMİNİ BİR NEÇƏ DƏFƏARTIRMAĞA İMKAN VERƏCƏKDİR

20.09.2006 [10:24]
Çap et
A⁺ A^-

“Azərenerji” Açıq Səhmdar Cəmiyyətinin mətbuat xidmətindən AZƏRTAC-a bildirmişlər ki, Astarada əlavə güc mənbələrinin yaradılması barədə Azərbaycan tərəfinin təkliflərinə iranlı həmkarlarının cavabından sonra həyata keçiriləcək tədbirlər qonşu ölkələr arasında enerji mübadiləsinin həcmini bir neçə dəfə artırmağa imkan verəcəkdir. Hazırda İranın “Təvanir” şirkətinin ekspertləri layihənin texniki-iqtisadi əsaslandırılması işini başa çatdırmaq üzrədirlər.

Azərbaycan-İran dövlətlərarası elektrikötürücü xətti vasitəsilə qonşu ölkənin enerji sisteminə hər gün 500-550 min kilovat-saat enerji verilir. Hər iki ölkənin enerji şirkətləri üçün mühüm strateji əhəmiyyət kəsb edən bu xətt, böyük perspektivə malikdir və paralel rejimdə işləməyi təmin edən sistemlərarası əlaqəni yaratmaq üçün iri Azərbaycan-İran beynəlxalq layihəsində mühüm mərhələ olacaqdır.

Layihənin həyata keçirilməsi ölkələrimiz arasında enerji mübadiləsini 700 meqavatadək artırmağa imkan verəcəkdir.