Qatar maşinistlərinin yeni kursu başlayıb
Bakı, 5 aprel, AZƏRTAC
“Bakı Metropoliteni”nin təşkil etdiyi növbəti qatar maşinisti kursunun birinci mərhələsi yekunlaşıb. Kurs üçün seçimlərə 30 nəfərdən çoxu qadın olmaqla, 500-dən artıq namizəd qatılıb, yekunda 194 nəfər tələblərə uyğun görülüb.
AZƏRTAC xəbər verir ki, bu fikirləri “Bakı Metropoliteni” QSC-nin sədr müavini Hidayət Məmmədov deyib.
Qeyd edib ki, təhsili və yaş həddi uyğun olmayan 299 nəfərlə yanaşı, 7 müraciət edən şəxs də müddətli həqiqi hərbi xidməti keçmədiyindən müsabiqəyə cəlb olunmayıb: “Dəvət edilənlərdən 120 nəfəri məntiq və metropolitenlə bağlı ibtidai biliklər üzrə ilk test müsabiqəsinə qatılıb, daha sonra müsahibə, psixoloji və sağlamlıq testlərində iştirak ediblər.
Son mərhələdə 2 nəfəri xanım olmaqla, 20 müdavim maşinist peşəsinə yiyələnmək üçün kursa başlayıb. Müdavimlər əvvəlcə nəzəri bilikləri mənimsəməklə metropolitenin əsas sahələri ilə yaxından tanış olublar. Onlara metropoliten infrastrukturu, vaqonların təmir və baxış sahələri, texniki xidmət, əsas təlimat tələbləri və digər anlayışlar tədris edilib. Kursda iştirak edən müdavimlər tədris planına uyğun hər tədris dövründə imtahanlara cəlb ediliblər. Nəzəri mərhələlərin yekununda 9 müdavim, o cümlədən xanımlardan biri sınaq imtahanlarında müvəffəqiyyət qazana bilməyərək kursu tərk edib. Digər 11 nəfər Təlim-tədris mərkəzində quraşdırılmış ən müasir qatar trenajorunda praktiki vərdişləri öyrənərək imtahanlara cəlb olunub”.
On bir iddiaçının kadr komissiyası qarşısında sınaq imtahanı verəcəyini söyləyən QSC-nin sədr müavini bildirib ki, uğur qazananlar bu dəfə metropoliten xətlərində praktiki vərdişlərin möhkəmləndirilməsi üzrə təlimlərə başlayacaqlar. “Bakı Metropoliteni” tarixində ikinci dəfə qadın maşinist adını qazanmağa yaxın olan müdavim də praktiki mərhələdə iştirak edəcək. Bütün namizədlər metropoliten maşinistləri ilə birgə xəttə çıxaraq iş mühitində formalaşmağın vacib cəhətləri ilə tanış olacaq və praktiki idarəetmə bacarığının qiymətləndirilməsi əsasında imtahan verəcəklər. Sonuncu mərhələdə xətlərdə idarəetmə normativlərini yerinə yetirənlər yenidən kadr komissiyası qarşısına çıxarılacaqlar.
“Bakı Metropoliteni”ndə qatar maşinisti peşəsi üzrə yeni seçim qaydası 2018-ci ildən tətbiq olunur. Həmin vaxt kursa cəlb olunmuş müdavimlər 2019-cu il aprelin 1-dən metropolitendə işə qəbul ediliblər. Onlar arasında “Bakı Metropoliteni”nin hələlik yeganə qadın maşinisti də var.
Bölmənin digər xəbərləri
