QAZAX RAYONU İCRA HAKİMİYYƏTİNİN BAŞÇISI RAUF HÜSEYNOVUN ÇIXIŞI
-Möhtərəm cənab Prezident,
Hörmətli mərasim iştirakçıları!
Bu gün qədim Qazax torpağına gəlişiniz rayonun həyatında əlamətdar bir hadisədir. Üçüncü dəfədir ki, dövlət başçısı qazaxlıların görüşünə gəlir. İcazə verin, Sizə Qazağın bütün sakinlərinin salamlarını çatdırım.
Möhtərəm cənab Prezident, Azərbaycan xalqının ümummilli lideri Heydər Əliyev Qazağa üç dəfə səfər etmişdi. Onun rayonumuza hər səfəri Qazağın sosial-iqtisadi dirçəlişinə güclü təkan vermişdir. Bu, ulu öndərin Qazağa və qazaxlılara məhəbbətinin əyani təzahürü idi. Böyük Heydər Əliyevin Qazağa göstərdiyi diqqət və qayğı bu gün Sizin tərəfinizdən davam etdirilir. Bu qayğını hər bir qazaxlı, rayonun hər bir sakini hiss edir və buna görə də Sizə minnətdardırlar. Bu gün açılışına toplaşdığımız müasir və möhtəşəm Olimpiya İdman Kompleksi bu qayğının əyani təzahürüdür.
Möhtərəm cənab Prezident, Azərbaycan xalqının ümummilli lideri Heydər Əliyev 1998-ci ildə Qazaxda olarkən demişdir: “Əziz qazaxlılar, siz burada Azərbaycanın ön cərgəsində, ən ucqar nöqtəsində durmusunuz. Həm torpağınızı qoruyursunuz, həm də Azərbaycanı qoruyursunuz. Siz bütün Azərbaycan xalqının dayağısınız”.
Dahi Prezident tərəfindən Qazağa və onun sakinlərinə verilən bu böyük qiymət qəlbimizi qürur hissi ilə doldurmuşdur.
Möhtərəm cənab Prezident, Ramana qəsəbəsi yaxınlığında məcburi köçkün ailələri üçün salınmış yeni qəsəbənin açılış mərasimində dediyiniz “biz öz ərazi bütövlüyümüzü istənilən yolla bərpa edəcəyik” sözləri biz qazaxlıların da ürəyincədir. Qazax sakinləri həmişə Sizin arxanızda mərd-mərdanə dayanıb və torpaqlarımızın azad olunmasına, ərazi bütövlüyümüzün bərpa edilməsinə hər an hazırdırlar.
Möhtərəm cənab Prezident, Sizin rayonumuza hər bir gəlişiniz regionların sosial-iqtisadi inkişafına dair Dövlət proqramının uğurlu icrasına etibarlı zəmin yaradır. İcazə verin, fürsətdən istifadə edərək, Sizə bu barədə qısa məlumat verim.
Ötən dövr ərzində rayonda “Zili” xalçaçılıq müəssisəsinin, konserv zavodunun, “Şahnigar” Məhdud Məsuliyyətli Cəmiyyətinin, Bentonit gil kombinatının fəaliyyəti bərpa edilmişdir. Yeni istehsal sahələri olan “İmperial” şirkəti, mişar daşı karxanası, “Damla” süfrə suyu istehsal edən müəssisə, tökmə və daşyonma sexləri yaradılmışdır. Son üç ildə rayonda 3990 yeni iş yeri yaradılmışdır ki, bunlardan da 2402-si daimidir. Bu, Sizin sahibkarlığın inkişafına göstərdiyiniz böyük qayğının təzahürüdür.
Sizin tapşırığınızla, respublikanın bütün bölgələrində olduğu kimi, Qazaxda da abadlıq-quruculuq işləri geniş vüsət almışdır. 6,9 kilometrlik şəhərdaxili yollara asfalt salınmışdır. 50 min kvadratmetr sahəyə üzlük plitə döşənilir. Küçələrdə yeni işıqlandırma sistemləri quraşdırılmışdır. Heydər Əliyev adına park yenidən qurulmuş, ulu öndərin qranit heykəli ucaldılmışdır. Bu, qədirbilən qazaxlıların ümummilli liderin əziz xatirəsinə böyük məhəbbət və ehtiramının təzahürüdür.
Ötən müddət ərzində şəhərin mərkəzində “Mütəfəkkirlər bağı”, Ana və uşaq parkı, Dədə Qorqud abidə kompleksi yaradılmış, İsmayıl Şıxlı adına park salınmış və orada görkəmli yazıçının abidəsi ucaldılmışdır. Səməd Vurğun Poeziya evi və Qazax Dövlət Rəsm Qalereyası müasir standartlara uyğun olaraq əsaslı təmir edilmişdir. Bu da Sizin qazaxlılara olan diqqətinizin nümunəsidir.
Möhtərəm cənab Prezident, ölkəmizdə sağlam və savadlı gənc nəslin yetişdirilməsini təmin etmək məqsədi ilə Sizin tapşırığınızla bütün bölgələrdə, o cümlədən Qazaxda təhsil müəssisələri, diaqnostika və müalicə mərkəzləri, idman qurğuları inşa olunur. Bütün bunlar xalqımızın, millətimizin sağlam genefonda malik olmasına etibarlı zəmin yaradır.
Son üç ildə rayonumuzda 1060 şagird yerlik üç yeni məktəb binası istifadəyə verilmiş, üç məktəbdə 380 yerlik yeni sinif otaqları inşa olunmuş, 12 məktəb əsaslı təmir edilmişdir. Məktəblərin ikisi Heydər Əliyev Fondunun həyata keçirdiyi “Yeniləşən Azərbaycana yeni məktəb” proqramı çərçivəsində tikilmişdir. İki yeni məktəb binasının tikintisində isə işlər uğurla davam etdirilir. Biz qazaxlılar buna görə Mehriban xanım Əliyevaya dərin minnətdarlığımızı bildiririk. Bütün bunlar Qazax rayonunda təhsil sisteminin daha da yaxşılaşmasına və gənc nəslin təlim-tərbiyəsinə göstərilən qayğının bariz nümunəsidir.
Hazırda rayonda müasir tipli diaqnostika mərkəzinin tikintisi də uğurla davam etdirilir.
Möhtərəm cənab Prezident, 2004-cü ildə rayonumuzda olarkən, Siz qazaxlı gənclərin arzusunu nəzərə alaraq, rayonda Olimpiya İdman Kompleksinin tikintisinə kömək edəcəyinizi bildirmişdiniz. Çox sevinirik ki, Siz bizim bu arzumuzu reallaşdırdınız. Bu yüksək qayğıya görə, Sizə bir daha rayonumuzun bütün sakinlərinin təşəkkürünü və dərin minnətdarlığını çatdırıram.
Möhtərəm cənab Prezident, əmin ola bilərsiniz ki, Vətənimizin tərəqqisi, xoş, nurlu sabahı, xalqımızın firavan və xoşbəxt həyatı naminə gördüyünüz bütün işlərdə biz qazaxlılar Sizinlə olacağıq, fəaliyyətinizi daim dəstəkləyəcəyik. Biz Azərbaycanın xoşbəxt gələcəyinə inanırıq və bu gələcəyi böyük Heydər Əliyevin parlaq ideyaları və Sizin adınızla bağlayırıq.
Bölmənin digər xəbərləri
