Qazaxda “Konstitusiya və Suverenlik İli”nə həsr olunmuş intellektual yarış keçirilib
Qazax, 11 aprel, Ruslan Novruzoğlu, AZƏRTAC
Qazax Rayon Heydər Əliyev Mərkəzində Azərbaycan Prezidentinin 28 dekabr 2024-cü il tarixli Sərəncamına əsasən, 2025-ci ilin “Konstitusiya və Suverenlik İli” elan edilməsi ilə əlaqədar mədəniyyət müəssisələrinin əməkdaşları arasında intellektual yarış keçirilib.
AZƏRTAC-ın bölgə müxbiri xəbər verir ki, Heydər Əliyev Mərkəzi və Mədəniyyət İşçiləri Həmkarlar İttifaqı Qazax Rayon Komitəsinin birgə təşkilatçılığı ilə keçirilən tədbir Dövlət Himninin səsləndirilməsi ilə başlayıb. Azərbaycan xalqının Ümummilli Lideri Heydər Əliyevin və torpaqlarımızın ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.
Tədbirin əhəmiyyətindən söz açan mərkəzin direktoru Ceyhunə Hüseynova bildirib ki, Azərbaycan xalqı bu gün əsrlər boyunca arzusu ilə yaşadığı, mübarizə apardığı müstəqil, suveren, qalib dövlətə sahibdir: “Qəhrəman əsgər və zabitlərimizin, şəhidlərimizin qanı hesabına xalqımızın milli sərvəti sayılan ərazi bütövlüyümüz, suverenliyimiz tam bərpa olunub. Bütün ölkə ərazisində Konstitusiya quruluşumuz bərqərar edilib. Xalqımız böyük qürur və fəxarət hissi ilə bu il müəllifi Ümummilli Lider Heydər Əliyev olan Konstitusiyamızın qəbul edilməsinin 30-cu və Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsində qazanılmış tarixi Qələbəmizin 5-ci ildönümünü təntənə ilə qeyd edəcək. Bu intellektual yarış Zəfər tariximizin və Konstitusiyamızın təbliğ edilməsində mühüm əhəmiyyət daşıyır”.
Mədəniyyət İşçiləri Həmkarlar İttifaqı Qazax Rayon Komitəsinin sədri İsgəndər Qurbanov deyib ki, düşmən üzərində tarixi Zəfər regionda və dünyada yeniliklərə yol açıb, Azərbaycanın gücünü, qüdrətini hər kəsə bəyan edib: “Müəllifi Ulu Öndər olan, 1995-ci ildə qəbul edilən Konstitusiyamız Azərbaycanın hüquqi dövlət kimi möhkəmlənən mövqeyində əsas rol oynayıb. Bu gün hər birimiz müasir, müstəqil ölkəmizin uğurları, regionda və dünyada söz sahibi olması ilə fəxr edirik. “Konstitusiya və Suverenlik İli”nin mədəniyyət işçilərinin əməkdaşları arasında təbliği istiqamətində daha geniş fəaliyyət göstərəcəyik”.
Yarışda hərəsində 5 iştirakçı olmaqla 8 komanda 5 mərhələdə birincilik uğrunda mübarizə aparıb. İştirakçılara Azərbaycanın Konstitusiyasının qəbul edilməsinin, ölkəmizin hüquqi, dünyəvi dövlət quruculuğunda keçdiyi tarixi yol, suverenliyimizin, ərazi bütövlüyümüzün qorunması, möhtəşəm Zəfərimiz, qəhrəman şəhidlərimiz haqqında müxtəlif mövzularda suallar ünvanlanıb.
3 nəfərdən ibarət münsiflər heyəti - Mədəniyyət İşçiləri Həmkarlar İttifaqı Qazax Rayon Komitəsinin sədri İsgəndər Qurbanov, Qazax Rayon Heydər Əliyev Mərkəzinin direktoru Ceyhunə Hüseynova, Qazax Rayon Mədəniyyət Mərkəzinin metodisti Zülfiyyə Mürsəlova intellektual obyektivliyi təmin etmək üçün yarışın gedişatını yaxından izləyiblər.
Maraqlı və gərgin mübarizə şəraitində keçən intellektual yarışda Qazax Rayon Mərkəzləşdirilmiş Kitabxana Sisteminin komandası bütün mərhələlərdə fərqlənərək 1-ci yerə layiq görülüb.
Qalib komanda mükafatlandırılıb, bütün iştirakçılara fəxri fərman və hədiyyələr təqdim olunub.
Bölmənin digər xəbərləri
