Qazaxıstan Azərbaycanın Cənubi Qafqazda yükdaşımaların həcminin artırılması istiqamətində səylərini dəstəkləyir
Bakı, 23 aprel, AZƏRTAC
Bu il biz ölkələrimiz arasında Dostluq və Strateji Əməkdaşlıq Haqqında müqavilənin 20 illiyini qeyd edirik. Qlobal müharibələrin getdiyi dövrdə bu dostluq və əməkdaşlığın böyük əhəmiyyəti var.
AZƏRTAC xəbər verir ki, bunu Qazaxıstan Strateji Araşdırmalar İnstitutunun direktoru Erkin Tukumov Bakıda keçirilən Azərbaycan-Qazaxıstan Ekspert Şurasının IV iclası çərçivəsində bildirib.
E.Tukumov iki ölkə arasında iqtisadi əməkdaşlıqdan danışaraq ticarət dövriyyəsində qeydə alınan artımın davam etdiyini vurğulayıb.
“Ümumilikdə isə biz infrastruktur layihələrinə fokuslanmalıyıq. Bu ilin ortalarında Çinə yükdaşımaların həcmini artıracaq dəmir yolu xəttinin inşasını başa çatdırmağı planlaşdırırıq. Azərbaycan həm Mərkəzi, həm də Cənubi Asiya ilə əməkdaşlığın inkişafında maraqlıdır. Qazaxıstan Azərbaycanın Cənubi Qafqaz regionuna yükdaşımaların həcminin artırılması istiqamətindəki səylərini dəstəkləyir. Son bir il ərzində Transxəzər Beynəlxalq Nəqliyyat Marşrutu ilə daşımaların həcmi 62 faiz artaraq ildə 4,5 milyon tona çatıb. İnfrastrukturun yenilənməsinə diqqət yetirilməlidir. Qazaxıstan artıq dəmir yollarının, limanların və turizm hablarının modernləşdirilməsinə 35 milyard dollardan çox investisiya yatırıb”, - deyə o qeyd edib.
Bölmənin digər xəbərləri
