Qazaxıstanda ilk AES-in tikintisinə rəsmən start verilib
Bakı, 8 avqust, AZƏRTAC
Qazaxıstan tarixində ilk AES-də tikinti işlərinə rəsmi start Almatı vilayətinin Ulken kəndi yaxınlığında verilib.
AZƏRTAC “Kazinform”a istinadla xəbər verir ki, tədbirdə Qazaxıstan Respublikasının Atom Enerjisi Agentliyinin rəhbəri Almasadam Satkaliyev, Rusiyanın “Rosatom” dövlət korporasiyasının baş direktoru Aleksey Lixaçev və digər rəsmi şəxslər iştirak ediblər.
Almasadam Satkaliyev çıxışında qeyd edib ki, hazırkı mərasim mühəndis-axtarış işlərinin başlanmasının – Qazaxıstanda AES-in tikintisinə hazırlığın əsas mərhələsinin rəmzidir. Bu mərhələnin nəticələri yalnız konkret sahənin seçilməsi və stansiyanın konfiqurasiyasından deyil, həm də onun təhlükəsizliyi, etibarlılığı və iqtisadi səmərəliliyindən asılıdır.
Onun sözlərinə görə, AES-in tikintisi layihəsi geniş ictimaiyyətin dəstəyi ilə həyata keçirilir.
Qazaxıstan rəsmisi əlavə edib: “Layihəyə qoyulan investisiyaların ümumi həcmi təxminən 14-15 milyard dollar təşkil edəcək. Sosial obyektlərin və müasir infrastrukturun tikintisinə əlavə 1 milyard dollar ayrılacaq”.
O, layihədə Qazaxıstan müəssisələrinin və elmi-tədqiqat təşkilatlarının fəal iştirakına xüsusi diqqət yetirildiyini vurğulayıb. Bu, yerli istehsalın yüksək səviyyəyə qalxmasına, minlərlə yeni iş yerinin yaradılmasına, nüvə elminin beynəlxalq standartlara uyğun inkişafına imkan verəcək.
A.Satkaliyev onu da qeyd edib ki, AES nüvə sənayesinin inkişafı, sənaye-innovativ tərəqqi və ölkənin uzunmüddətli iqtisadi yüksəlişi üçün aparıcı qüvvəyə çevriləcək strateji layihədir.
Mərasim çərçivəsində qruntun yığılması üçün qazma işlərinə də başlanılıb. Nümunələr olan kapsul araşdırma üçün Rusiya tərəfinə təhvil veriləcək.
Artıq tikinti meydançasında xüsusi avadanlıq var və burada Novovoronej AES-in maketi quraşdırılıb. Qazaxıstan Respublikasının Atom Enerjisi Agentliyinin məlumatına görə, gələcək Qazaxıstan stansiyası bu AES-ə bənzər tikiləcək. Maketdə dünyada ilk 3+ nəsil olan №6 enerji bloku göstərilir.
Qazaxıstanda ilk AES-in tikintisinin başa çatdırılması 2035-2036-cı illər üçün planlaşdırılır.
“Rosatom” bundan əvvəl Qazaxıstanda ilk AES-in tikintisi üzrə beynəlxalq konsorsiumun lideri seçilib.
Bölmənin digər xəbərləri
