Qəbələdə 72 hektar sahədə yeni meşəlik salınmışdır
Qəbələ, 11 yanvar (AZƏRTAC). Qəbələ rayonunda meşələrin mühafizəsi və bərpası daim diqqət mərkəzində saxlanılır.
Rayonun baş meşəbəyisi İlqar Cəlalov AZƏRTAC-a bildirmişdir ki, Qəbələdə yeni meşəliklərin salınması mövsümü bu günlərdə uğurla başa çatmışdır. Plana uyğun olaraq rayonun Bum, Vəndam, Yenikənd və Zarağan meşəbəyliklərinin ərazisindəki dövlət meşə fondunun torpaqlarında 72 hektar sahədə mədəni meşə salınmışdır. Həmin ərazilərə, ümumilikdə, 75 min ağac tingi əkilmişdir. Əkin zamanı qoz, şabalıd, akasiya, vələs, göyrüş, ağcaqayın, palıd, fıstıq və digər qiymətli ağac növlərinə üstünlük verilmişdir.
Bundan əlavə, daha 30 hektar ərazidə meşəliyin salınması üçün hazırlıq işləri görülür. Bunun üçün rayon meşələrin mühafizəsi və bərpası müəssisənin kollektivi 2 hektar sahədə yeni tinglik salmışdır. Hazırda orada 500 min ədəd ting yetişdirilir. Rayon meşəçiləri ağac əkini üçün 5837 kiloqram toxum toplamışlar. Bunun 3550 kiloqramını palıd, 561 kiloqramını qoz, 1557 kiloqramını şabalıd, 102 kiloqramını göyrüş, 42 kiloqramını ağcaqayın toxumu təşkil edir.
Yaz aylarında ağac əkini və toxum səpini mövsümünə başlanılacaqdır. Cari ilin payızında isə 40 hektar sahədə meşəliyin salınması nəzərdə tutulur.
Rayonun meşəçiləri 2012-ci ildə 33 min 976 hektar sahədə mövcud dövlət meşə fondunun mühafizəsini və bərpasını uğurla həyata keçirmiş, yanğından mühafizə məqsədilə tədbirlər görmüş, təbii bərpaya kömək tədbirlərini reallaşdırmışlar.
Bölmənin digər xəbərləri
