Qətər XİN: İranın enerji obyektlərinə hücumları təhlükəli presedent yaradır
Qahirə, 10 mart, AZƏRTAC
Qətərin İranla əlaqə kanalları tam kəsilməyib. Hər hansı danışıqlara başlamazdan əvvəl İran Qətərə və digər Körfəz ölkələrinin paytaxtlarına hücumları dayandırmalıdır. Münaqişələr danışıqlar yolu ilə həll edilə bilər.
AZƏRTAC “əl-Cəzirə” telekanalına istinadla xəbər verir ki, bunu Qətərin Xarici İşlər Nazirliyinin sözçüsü Macid əl-Ənsari bu gün keçirdiyi mətbuat konfransında deyib.
İranın təcavüzü barədə danışan Ənsari qeyd edib ki, enerji obyektlərinə qarşı hücumlar təhlükəli presedent yaradır və bu, iqtisadi itkilərə, eləcə də qlobal problemlərə səbəb ola bilər. Vurğulayıb ki, infrastruktur obyektlərinə hücumlar davam edəcəyi təqdirdə humanitar fəlakət qaçılmaz olacaq.
Ölkəsində vəziyyətin sabit olduğunu qeyd edən XİN-in nümayəndəsi Qətər ordusunun İran hücumlarının qarşısını almaqda davam etdiyini vurğulayıb. Diqqətə çatdırılıb ki, Tehran hələ də Qətərdə mülki infrastruktura hücumlar həyata keçirir.
Qətərin silahlı qüvvələri ötən gün 17 ballistik raketi və 6 pilotsuz uçuş aparatını zərərsizləşdirib.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
