Qeydiyyatı olmayan vətəndaş nə kimi çətinliklər və məhdudiyyətlərlə qarşılaşa bilər?
Bakı, 8 sentyabr, Ayla Aktar, AZƏRTAC
Bir çox vətəndaşların ev qeydiyyatı ilə bağlı sualları və bilmədikləri məqamlar olur. Bu mövzu ilə bağlı AZƏRTAC-ın suallarını Vəkillər Kollegiyasının üzvü Anar Məmişov cavablandırıb.
- Heç bir evdə qeydiyyatı olmayan Azərbaycan vətəndaşı buna görə cərimə oluna bilərmi?
- Hər bir şəxs hər bir halda qeydiyyatda olmalıdır. Qeydiyyatsız qalmaq mümkün deyil. Vətəndaş yaşadığı ev üzrə qeydiyyatdan keçmirsə və yaxud qeydiyyata alınma qaydalarını pozursa, o zaman o, İnzibati Xətalar Məcəlləsinin 563.1-ci maddəsi ilə cərimə olunur. Öncə həmin şəxsə xəbərdarlıq edilir və yaxud otuz manat məbləğində cərimə oluna bilər.
- Qeydiyyatı olmayan vətəndaş nə kimi çətinliklər və məhdudiyyətlərlə qarşılaşa bilər?
- Əgər vətəndaş heç bir yerdə qeydiyyatda deyilsə, onun şəxsiyyət vəsiqəsi qüvvədə olmamış hesab olunur. Həmin şəxs etibarnamə verə bilmir, alqı-satqı edə bilmir, notarial əməliyyatlar apara bilmir, şəxsiyyət vəsiqəsi aktiv olmadığı üçün nikaha daxil ola bilmir, nikaha xitam verə bilmir. Yəni, şəxsiyyət vəsiqəsi qüvvədə olmadığı üçün şəxsiyyət vəsiqəsi ilə bağlı heç bir əməliyyatı həyata keçirə bilmir.
- Ev sahibi hər hansı bir vətəndaşı evinə qeydiyyata salarsa, həmin vətəndaşın o ev üzərində haqqı yaranırmı?
- Əgər ev sahibi vətəndaşı qeydiyyata alarsa, həmin vətəndaşım yalnız istifadə hüququ yarana bilər. Qeydiyyatda olmaq heç bir başqa hüquq yaratmır. Sadəcə həmin evdə qeydiyyatda olur. Qeydiyyata düşmüş şəxsin mülki hüququ yaranmır.
- Ev sahibi istədiyi vaxt evində qeydiyyatda olan şəxsi qeydiyyatdan çıxarmaq hüquqa malikdirmi?
Ev sahibi qeydiyyatda olan şəxsi yalnız məhkəmə ilə çıxara bilər. Məhkəmə yolu olmadan inzibati qaydada şəxsi qeydiyyatdan çıxara bilməz. Şəxs özü başqa ünvana qeydiyyata düşməlidir ki, həmin ünvandan qeydiyyatdan çıxmış sayılsın.
- Ölkəmizdə müvəqqəti qeydiyyat varmı?
Yaşayış yerindən kənarda 60 gündən artıq müvəqqəti yaşamaq istəyən vətəndaş həmin yerə gəldikdən sonra 7 gün ərzində (istirahət, səsvermə, iş günü hesab edilməyən bayram günləri və ümumxalq hüzn günü istisna olmaqla) ərizə-anket dolduraraq müvafiq dövlət orqanına təqdim etməlidir. Həmin orqan vətəndaşı dərhal olduğu yer üzrə qeydiyyata almalıdır.
Bölmənin digər xəbərləri
