Qırğızıstan Prezidenti Türk Şurasının Baş katibini qəbul edib
Bişkek, 15 mart, AZƏRTAC
Qırğızıstan Prezidenti Sadır Japarov Türkdilli Dövlətlərin Əməkdaşlıq Şurasının Baş katibi Bağdad Amreyevi qəbul edib.
AZƏRTAC Qırğızıstan Prezidentinin informasiya siyasəti şöbəsinə istinadla xəbər verir ki, görüşdə Qırğızıstanla Türk Şurası arasında əməkdaşlığın daha da genişləndirilməsi, üzv dövlətlərlə daha konstruktiv dialoq aparılması məsələləri ətrafında fikir mübadiləsi aparılıb.
Sadır Japarov bildirib ki, Türk Şurası türkdilli dövlətlər arasında əməkdaşlığın gücləndirilməsi istiqamətində yaxşı nəticələr əldə edib, beynəlxalq birliyin dəstəyini qazanıb.
Prezident deyib ki, Qırğızıstan bundan sonra da türkdilli dövlətlər arasında dostluğun və qardaşlığın möhkəmləndirilməsinə töhfə verəcək.
Bağdad Amreyev Qırğızıstan Prezidentinin Qazaxıstana və Özbəkistana rəsmi səfərlərinin uğurlu keçdiyini, bu səfərlərin ümumi türk dünyasının daha da dərinləşdirilməsi istiqamətində mühüm addım olacağını bildirib.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
