QIRĞIZISTAN XALQLARI ASSAMBLEYASININ NÖVBƏTİ QURULTAYI OLMUŞDUR

04.02.2004 [13:25]
Çap et
A⁺ A^-

AZƏRTAC-ın müxbiri xəbər verir ki, Bişkek şəhərində Qırğızıstan Xalqları Assambleyasının dördüncü qurultayı keçirilmişdir. Forumda 31 milli mədəniyyət mərkəzindən 700-dən artıq nümayəndə, dövlət strukturlarının və siyasi partiyaların rəhbərləri, diplomatik korpusun üzvləri iştirak etmişlər. Azərbaycan diasporu Bişkekdəki “Azəri” Mədəniyyət Mərkəzinin sədri Akif Allahverdiyevin rəhbərlik etdiyi 20 nəfərlik nümayəndə heyəti ilə təmsil olunmuşdur.

Qırğızıstan Prezidenti Əskər Akayev milli birliyin və sabitliyin əldə olunmasında Qırğızıstan Xalqları Assambleyasının xüsusi rolu olduğunu vurğulamış, bu sahədə xidmətlərinə görə Assambleyaya “Danaker” ordeni təqdim etmişdir.

Prezident milli azlıqların nümayəndələrinə və qonaqlara müxtəlif mükafatlar vermişdir. Fəxri fərman alanlar arasında Azərbaycan diasporunun fəal üzvlərindən olan Qiyas Xəlilov da var.

Qurultayda Qırğızıstanın etnik inkişaf konsepsiyasının layihəsi müzakirə olunmuş, ölkədə yaşayan xalqlara müraciət qəbul edilmişdir.