Qısa ömrün uca zirvəsi: xüsusi təyinatlı döyüşçü Yalçın Rəhimov
Bakı, 18 dekabr, AZƏRTAC
İyirmi yaşlı xüsusi təyinatlı hərbçi Yalçın Elçin oğlu Rəhimov 44 günlük Vətən müharibəsində Qarabağın azadlığı, ərazi bütövlüyümüz uğrunda göstərdiyi igidliyi ilə adını Azərbaycan xalqının qəhrəmanlıq salnaməsinə yazdırdı.
AZƏRTAC xəbər verir ki, qısa, lakin şərəfli həyat yolu keçən Yalçın Rəhimov 2000-ci il iyulun 25-də Ağsu rayonunun Çaparlı kəndində sadə, zəhmətsevər bir ailədə dünyaya göz açıb. Ailənin üçüncü övladı - sonbeşiyi idi, bir bacısı, bir qardaş vardı.
Orta məktəbi Nardaranda oxuyan Yalçın boş vaxtlarında işləyərək ailəsinə kömək edərdi. O, hələ uşaqlıqdan kikboksinq, güləş və üzgüçülük ilə məşğul olurdu. Kikboksinq yarışlarında Fəxri Fərman, diplom və medallara layiq görülmüşdü. Peşəkar hərbçi olmağı arzulayırdı. Gülərüzlüyü, istiqanlılığı, dostcanlılığı, qohumcanlılığı ilə fərqlənirdi.
2018-ci ilin oktyabrında Müdafiə Nazirliyinin Naxçıvan şəhərində yerləşən “N” saylı hərbi hissəsində xidmətə yollanıb. Həqiqi hərbi xidmət keçərək dövlətinə vətəndaşlıq borcunu şərəflə yerinə yetirdikdən sonra xidmətini Azərbaycan Respublikasının Xüsusi Təyinatlı Qüvvələrində (XTQ) davam etdirib.
Xüsusi Təyinatlı Qüvvələrdə xidmət üçün xüsusi dözümlülük və cəsarət tələb olunur. Azərbaycanın ən güclü qoşun növünə seçim ciddi tələblərlə aparılır. Məlumatlara görə, 500 namizəddən kurs sonrası yalnız 30 nəfəri “Qırmızı beret” sertifikatını ala bilir. Kurslarda iştirak etmiş şəxslərə xüsusi əməliyyat keçirmək üçün ekstremal şəraitlərə dözmək, günlərlə ac-susuz qalmaq, müxtəlif silahların istifadə qaydası, bir sözlə mətin döyüşçü olmaq öyrədilir.
Yalçın xidməti dövründə bir çox kurslarda və təlimlərdə iştirak edib, dəfələrlə Fəxri fərmanlara, sertifikatlara layiq görülüb. Bütün yarışlarda, əməliyyatlarda fərqlənirdi, cəsur, fədakar, cəldliyi, çevikliyi ilə seçilən hərbçi idi.
Xüsusi Təyinatlı Qüvvələrin tərkibində Vətən müharibəsində iştirak edən Yalçın qızğın döyüşlərdə düşmənin bir neçə zabit və hərbi qulluqçusunu, eyni zamanda, zirehli texnikasını məhv edib.
Qarabağ müharibəsinin ən həlledici məqamlarından olan Şuşanın işğaldan azad edilməsi uğrunda gedən şiddətli döyüşlərdə yaralanan Yalçın digər yaralı cəbhə yoldaşlarını döyüş meydanından çıxarıb. Yenidən döyüş meydanına geri dönərkən mühasirəyə düşüb. Düşmənə təkbaşına meydan oxuyan igid hərbçi əlbəyaxa döyüşlərdə düşmənin çox sayda canlı qüvvəsini məhv edib. Erməni quldurları ilə təkbətək vuruşmada boyun nahiyəsindən aldığı ağır xəsarət nəticəsində noyabrın 7-də qəhrəmancasına həlak olub.
Şəhid Yalçın Rəhimov noyabrın 13-də Ağsu rayonunun Çaparlı kənd qəbiristanlığında xüsusi hörmət-izzətlə dəfn edilib.
Qardaşı Rasim Rəhimov da könüllü olaraq Vətən müharibəsinə gedib, düşmənə qarşı şərəflə döyüşüb.
Vətən müharibəsinin 2783 şəhidinin qanı yerdə qalmadı. Rəşadətli Azərbaycan Ordusu doğma Qarabağımızı düşmən tapdağından qurtararaq şəhidlərimizin ruhunu şad etdi. Adı qəhrəmanlıq tarixinə yazılan Yalçın kimi vətənpərvər, cəsur qəhrəmanlarımızın xatirəsi heç vaxt unudulmayacaq, onların həyat yolu gələcək nəsillərə örnək göstəriləcək.
Yalçın qardaşımıza Ulu Tanrıdan rəhmət, ailə üzvlərinə isə, səbir və təmkin diləyirik.
Torpaqlarımızın azadlığı uğrunda canlarından keçmiş şəhidlərimizin ruhu qarşısında baş əyirik.
Allah şəhidlərimizə rəhmət eləsin!
Bölmənin digər xəbərləri
