“QLOBALLAŞAN DÜNYA VƏ AZƏRBAYCANLILAR” MÖVZUSUNDA TƏDBİR KEÇİRİLMİŞDİR
Əvvəlcə, Azərbaycanın dövlət himni səsləndirilmiş, xalqımızın ümummilli lideri, dünya şöhrətli siyasi xadim Heydər Əliyevin əziz xatirəsi bir dəqiqəlik sükutla anılmışdır.
Tədbirin təşkilatçısı, Azərbaycan Respublikası Vətəndaş Hüquqlarını Müdafiə Fondu “Dirçəliş” Gənclərin Sosial-Psixoloji Reabilitasiya Mərkəzinin direktoru İslam Baxşəliyev Dünya Azərbaycanlılarının Həmrəyliyi Gününün qeyd olunma tarixindən danışmışdır. Bildirmişdir ki, tədbirdən əsas məqsəd azərbaycanlı gənclərin cəmiyyətdə sosial nüfuza malik olan elm, mədəniyyət xadimləri ilə görüşünü təşkil etmək, gənclərin azərbaycançılıq ideyası ətrafında birləşməsinə yardım göstərməkdir.
Sonra Dünya Azərbaycanlıları Əlaqələndirmə Şurası sədrinin müavini Qulamrza Səbri Təbrizi, “Simurq” Mədəniyyət Mərkəzinin prezidenti, tarix elmləri doktoru Fuad Məmmədov və başqaları çıxış edərək dünya azərbaycanlılarının bir araya gəlməsində və 31 dekabr - Dünya Azərbaycanlılarının Həmrəyliyi Gününün qeyd olunmasında ümummilli lider Heydər Əliyevin xidmətlərindən, Azərbaycan Prezidenti İlham Əliyevin bu yöndə atdığı önəmli addımlardan, diasporumuzun inkişafına göstərdiyi qayğıdan geniş söhbət açmışlar. Qeyd olunmuşdur ki, gənclərimizin Prezident İlham Əliyevin ətrafında sıx birləşmələri, onun həyata keçirdiyi uğurlu xarici və daxili siyasəti dəstəkləmələri dövlətimizin dayaqlarını və Dünya birliyindəki yerini möhkəmlədir.
Xarici ölkələrin Azərbaycandakı səfirliklərinin, dini icmaların, qeyri–hökumət təşkilatları nümayəndələrinin də iştirak etdiyi tədbir mədəniyyət ustalarının iştirakı ilə davam etdirilmişdir.
Bölmənin digər xəbərləri
