Bakı, 20 dekabr, Tatyana İvanayeva, AZƏRTAC

Yubileylər həmişə uyğun ab-havada qeyd olunur. Təkcə adının öz-özlüyündə bir çox mətləbləri əks etdirdiyi bir insanın yubileyindən söhbət getdikdə isə, burada daha möhtəşəm və miqyaslı bir tədbirin olacağına hazırlaşmaq lazımdır.

Azərbaycan Dövlət Akademik Musiqili Teatrında Azərbaycanın Xalq artisti, Rusiyanın Əməkdar incəsənət xadimi, ictimai və siyasi xadim, ötən əsrin 60-cı illərinin ŞHK komandasının əfsanəvi kapitanı Yuli Solomonoviç Qusmanın tamaşaçılar tərəfindən ayaq üstə alqışlandığı tədbir də bu qəbildən idi. O, uzun onilliklərdən sonra yenidən 1976-1984-cü illərdə bədii rəhbəri olduğu teatrın səhnəsinə qalxdı.

Təəccüblü deyil ki, məhz burada -Yuli Solomonoviçin bir vaxtlar doğma teatrının səhnəsində “Qorxma, biz səninləyik!” tamaşa-konserti nümayiş etdirilib. Tamaşanın ideya müəllifi yubilyarın qardaşı, TASS informasiya agentliyinin baş direktorunun birinci müavini Mixail Qusmandır.

Əfsanəvi azərbaycanlının yubileyinin bayram edilməsi ideyası tamaşanın bədii rəhbəri, teatrın direktoru, Əməkdar incəsənət xadimi, fəlsəfə doktoru Əliqismət Lalayevə məxsusdur.

Yubilyarın quruluşçu-rejissor qismində çıxış etdiyi tamaşanın əsasını onun ekran əsəri təşkil edib. 42 il əvvəl çəkilmiş “Qorxma, mən səninləyəm!” kinofilmi televiziya ekranlarına çıxdıqdan sonra milyonlarla tamaşaçının sevimli ekran əsərinə çevrilib. Həm də təkcə çoxlu tryukların olduğu zəngin süjet xəttinə görə deyil. Rejissor çox gözəl aktyor heyəti seçə bilib, habelə ekranda cəlbedici macəra, bu gün deyildiyi kimi, Azərbaycan milli koloriti olan müzikl canlandırıb. Bütün bunlar bəstəkar, o vaxt 36 yaşı olan Polad Bülbüloğlunun həmin film üçün bəstələdiyi parlaq musiqi ilə müşayiət edilib.

Tamaşa-konsertin əsasında həmişə sevərək seyr edilən musiqili filmin necə yaradılması və lentə alınması prosesi əks olunub. Onun premyerası yubilyarın özünə və həmin tədbirə toplaşan çoxsaylı qonaqlara təqdim olunub. Librettonun müəllifi qismində Yelena İsayeva və həm də tamaşanın quruluşçu rejissoru olan Cavid İmamverdiyev çıxış ediblər.

Hadisələrin necə cərəyan etməsi, çəkiliş prosesindən əvvəl baş verənlər tamaşaçılar üçün maraqlı olub. Bu barədə tapşırılan məsuliyyətli işin öhdəsindən layiqincə gələn Emil Heydərovun obrazını canlandırdığı Yuli Qusmanın özü bəhs edir.

Yeri gəlmişkən, tamaşada həmin dövrün bir çox şəxsiyyətləri iştirak ediblər. Hazırda Azərbaycanın Rusiyadakı səfiri olan Polad Bülbüloğlu tamaşa zalından özünü müşahidə edib, Xalq artisti Həmidə Ömərova isə səhnədə özü ilə görüşüb. Burada Lev Durovun, Muxtarbek Kantemirovun və Mirzə Babayevin obrazları da olub. “Mühəndis Petrovun”, daha doğrusu Xalq artisti Aleksandr Şarovskinin səhnəyə qalxdığı vaxt filmin epizodu tamamilə teatr təcəssümü alıb.

Qeyd etmək lazımdır ki, səhnəyə çıxan məşhur aktyorlar təkcə yubilyarı təbrik etmək və ona öz sevgilərini çatdırmaqla kifayətlənmədilər. Onlar həm də təkcə filmlə bağlı deyil, eyni zamanda, uzun illər əvvəl Yuli Qusmanla hansısa şəxsi görüşləri barədə təəssüratlarını bölüşdülər. Tamaşa-konsertdə Xalq artisti Sərxan Sərxan çıxış edib. Yuli Solomonoviçi təbrik edənlər arasında Azərbaycan Karate Federasiyasının Prezidenti Yaşar Bəşirov və milli idman tariximizdə ən titullu karateçi Rəfael Ağayev də olublar. Onlar tamaşaçılara xatırladıblar ki, Yuli Qusman o vaxtlar öz filmi ilə milli karate məktəbinin əsasını qoyub. Bu səbəbdən ona ikinci qara kəmər və yeddinci Dan diplomu təqdim edilib. Filmdə Mərdan rolunu oynamış Cahangir Novruzov da videotəbrik göndərib.

“Qorxma, biz səninləyik!” tamaşasının süjeti “Qorxma, mən səninləyəm!” filminin ayrı-ayrı səhnələri ilə çulğaşırdı. Qusman-Heydərovun yumoru zalda xoş gülüş sədaları ilə müşayiət olunurdu və tədbirin baş qəhrəmanı Yuli Solomonoviç Qusmanın səhnəyə gəlişini hazırlayırdı. Hamıya tanış olan səsi eşidən tamaşaçı zalı nəfəsini tutaraq, sərt keşməkeşli dövrlərə rəğmən taleyini əbədi olaraq Bakı ilə bağlamış insanın minnətdarlıq dolu sözlərini dinləyirdi. Yubilyar məhz bu şəhərə - Bakıya sevgisini ifadə edir və bildirirdi ki, doğma şəhər gözəl və möhtəşəm olub. Məşhur bakılı məxsusi olaraq Heydər Əliyev Fonduna, Azərbaycan Mədəniyyət Nazirliyinə və kiçik qardaşına təşəkkürünü bildirdi. O, öz növbəsində böyük qardaşın xahişi ilə səhnəyə qalxdı və möhtəşəm təbrik - onun bütün həyatını əhatə edən filmlə bağlı heyrətamiz təəssüratını bölüşdü.

Yubiley tamaşasının sonunda yubilyarın böyük dostu Polad Bülbüloğlu təbriklərini çatdırmaqla yanaşı, filmin ən parlaq kompozisiyalarından biri olan və Azərbaycanda ən çox sevilən insanlardan biri - Yuli Solomoviç Qusmanın həyatı ilə səsləşən, özünəməxsus himnə çevrilmiş “Biz mübarizə edərək necə yaşadıq” mahnısını ifa edib. Zala toplaşanlar - tanınmış incəsənət xadimləri, ictimai xadimlər, yubilyarın dostları və istedadının pərəstişkarları onu ayaq üstə gurultulu alqışlarla və çiçək dəstəkləri ilə salamladılar...

Tamaşada Xalq artisti İlham Namiq Kamal, Əməkdar artistlər Şövqi Hüseynov və Fərid Əliyev, aktyorlar Rauf Babayev, Nicat Əli, xor artistləri və teatrın balet truppası iştirak edib. Quruluşçu rejissor - Əməkdar incəsənət xadimi Fəxrəddin Atayev, quruluşçu xormeyster, Əməkdar artist Vaqif Məstanov, quruluşçu baletmeyster, Əməkdar artist Emin Əliyev, qrim üzrə rəssam Aybəniz Hüseynova, rejissor assistenti Tamilla Aslanova olublar.

Qeyd edək ki, Polad Bülbüloğlunun “Qorxma, biz səninləyik” tamaşasında ifa etdiyi sehrli mahnı ilə bağlı unudulmaz anları yaşamaq istəyənlər dekabrın 20-21-də keçiriləcək konsert üçün şəhərin teatr-konsert kassalarında bilet əldə edə bilərlər.