Quba, 28 sentyabr, Elxan Yusifli, AZƏRTAC

Quba rayonunun Zərdabi qəsəbəsindən olan şəhid Səbuhi Əliyevin əkiz övladları dünyaya gəlib.

AZƏRTAC-ın bölgə müxbiri xəbər verir ki, Səbuhi Əliyev Qarabağ iqtisadi rayonunda keçirilən lokal xarakterli antiterror tədbirləri zamanı şəhidlik zirvəsinə ucalıb.

Yeni doğulan uşaqların hər ikisi qızdır. Körpələrə qəhrəman atanın ölümündən qabaq özünün seçdiyi Nərgiz və Nazlı adları verilib. İndi Əliyevlər ailəsində Səbuhinin yadigarı olan üç qız və bir oğlan övladı böyüyür.

Şəhid Səbuhi Əliyev 44 günlük Vətən müharibəsinin də iştirakçısı olub. Döyüşdə göstərdiyi qəhrəmanlığına görə “Cəsur döyüşçü” medalı ilə təltif edilib.