“Ramştayn” formatında yeni koalisiya elan edilib
Kiyev, 11 aprel, AZƏRTAC
Brüsseldə keçirilən Ukraynanın Müdafiəsi üzrə Təmas Qrupunun (“Ramştayn” formatı) növbəti iclasında radioelektron mübarizəsi koalisiyasının yaradılması elan edilib. Artıq 11 ölkə, o cümlədən Ukrayna da bu koalisiyaya qoşulub.
AZƏRTAC xəbər verir ki, bu barədə Ukrayna müdafiə naziri Rustem Umerov açıqlama verib.
Onun sözlərinə görə, yeni koalisiyası avadanlıqların alınması, mütəxəssislərin hazırlanması və elektron müharibə sahəsində siyasət və doktrinaların hazırlanması işini həyata keçirəcək.
"Elektron müharibə müasir hərbi münaqişələrin kritik tərkib hissəsidir. Effektiv elektron müdafiə olmadan heç bir bölmə tam döyüşə hazır ola bilməz. Koalisiyanın işə salınması bizə səyləri əlaqələndirməyə və Müdafiə Qüvvələrinin ehtiyaclarına hərtərəfli cavab verməyə imkan verəcək", - deyə Umerov əlavə edib.
Nazir bildirib ki, koalisiya nəinki əsgərlərin cari ehtiyaclarını ödəyəcək, həm də imkanların uzunmüddətli inkişafı üçün zəmin yaradacaq.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
