Rəhman Hacıyev “Yüksəliş” müsabiqəsinin iştirakçılarına müraciət etdi: Hədəfinizə doğru inamla irəliləməlisiniz
Bakı, 3 iyul, AZƏRTAC
Mən sizə bir tövsiyə vermək istərdim ki, heç vaxt öyrənməyi və öz üzərinizdə işləməyi dayandırmayın. Bu proses ömürboyu davam etməlidir. Mənə elə gəlir ki, öyrənməyi dayandırmaq hansısa kurslara və ya təlimlərə getməməkdən başlamır. Bu, insanın komfort zonasına daxil olduğu, özünü tam rahat hiss etdiyi və “artıq hər şeyi bilirəm” deyə düşündüyü andan başlayır. Məncə, bu, insanın özünə qarşı obyektivliyini itirməsi deməkdir və ən böyük risk də məhz buradadır.
AZƏRTAC xəbər verir ki, bunu Qarabağ Dirçəliş Fondunun sədri Rəhman Hacıyev “Yüksəliş” müsabiqəsinin yarımfinal mərhələsində çıxış edərkən deyib.
R. Hacıyev çətinliklərə hazır olmağın vacibliyinə toxunaraq deyib: “Ola bilsin ki, kiminsə həyat yolu bu günə qədər nisbətən rahat keçib. Ancaq həyat çətindir və rəqabətdir. Bu gün burada iştirak edənlərin sayına baxanda bunun bariz nümunəsini görürük. Finala və birinci yerə çatmaq uğrunda nə qədər həmkarınız mübarizə aparır. Həyatın özü də belədir. Gələcəkdə isə bu rəqabət daha sərt və daha çətin olacaq.
Ona görə də çətinliklərə hazır olmalıyıq. Bəzi layihələrimiz uğursuz ola bilər, bəzi insanlar bizi məyus edə bilər. Bəzən ciddi səhvlər etdiyimiz halda belə, problemlərdən asanlıqla çıxa bilərik. Bütün bunlar müəyyən məqamlarda bizdə ədalətsizlik hissi yarada bilər. Amma bunlar bizi dayandırmamalıdır. Siz hədəfinizə doğru inamla irəliləməli və qarşılaşacağınız bütün çətinliklərə hazır olmalısınız. Mən başa düşürəm ki, burada karyerasını quran, gələcək inkişafını düşünən, maddi vəziyyətini yaxşılaşdırmaq istəyən gənclər toplaşıb. Bunlar, əlbəttə ki, çox vacib məsələlərdir və bunu inkar etmirəm. Əksinə, onları vacib hesab edirəm. Amma düşünürəm ki, bunlardan da önəmli olan dəyərlər var. Həyat təcrübəm də bunu təsdiqləyir. Mənə görə, ilk növbədə, əsas borcumuz – xüsusilə də intellektual imkanları olan insanların ən böyük vəzifəsi yaxşı insan olaraq qalmaqdır. Bugünkü dünyada hökm sürən ədalətsizliklərə, müharibələrə və müxtəlif çətinliklərə baxmayaraq, hər birimiz imkanımız daxilində öz mühitimizi daha yaxşı etməyə çalışmalıyıq”.
Bölmənin digər xəbərləri
