Rektor: Türk dünyası ilə əməkdaşlığın genişləndirilməsini prioritet istiqamətlərdən biri kimi müəyyənləşdirmişik
Bakı, 3 iyul, AZƏRTAC
Birinci Türkoloji Qurultayın 100 illiyi münasibətilə keçirilən tədbirlər silsiləsi çərçivəsində Qarabağ Universitetində “Birinci Türkoloji Qurultayın elmi və mədəni mirası” mövzusunda konfransın keçirilməsi qürurvericidir. Həm Türk dünyasından, həm də digər ölkələrdən gələn türkoloq alimlərin Qarabağ Universitetinə səfəri elm ocağına böyük dəstək olmaqla yanaşı, onun beynəlxalq miqyasda tanıdılması üçün də gözəl imkandır.
Bunu AZƏRTAC-a açıqlamasında Qarabağ Universitetinin rektoru Şahin Bayramov deyib.
“Qarabağ Universiteti olaraq gələcək inkişaf strategiyamızda Türk dünyası ilə əməkdaşlığın genişləndirilməsini prioritet istiqamətlərdən biri kimi müəyyənləşdirmişik. Hesab edirik ki, Türk dünyasının ortaq dəyərləri, mədəniyyəti və dili ilə bağlı aparılan tədqiqatlar ali məktəbimizin fəaliyyətində özünəməxsus yer tutacaq. Konfrans çərçivəsində gələcək əməkdaşlıq imkanlarına dair olduqca uğurlu təmaslarımız oldu”,- deyə rektor qeyd edib.
Müxbir – Gülay Nəzərova
Bölmənin digər xəbərləri
