Nazir müavini: Xarici qonaqlar Qarabağda tarixi irsin yenidən dirçəldilməsi prosesinin şahidi oldular
Bakı, 3 iyul, AZƏRTAC
Birinci Türkoloji Qurultayın 100 illiyinə həsr olunmuş “Türk Dünyası Həftəsi” çərçivəsində keçirilən “Birinci Türkoloji Qurultay: yüz ilin elmi və mədəni irsi” mövzusunda beynəlxalq konqresdə ümumilikdə 20 ölkədən rəsmilər, müxtəlif elmi mərkəzlərdən126 türkoloq-alim, eləcə də türk beynəlxalq təşkilatlarından nümayəndələr iştirak ediblər. Tədbirlər zamanı Türk dünyasının ortaq tarixi, dili, ədəbiyyatı, mədəni irsi və elmi əməkdaşlığın perspektivləri ilə bağlı aktual mövzular ətrafında fikir mübadiləsi aparılıb.
Bunu AZƏRTAC-a açıqlamasında mədəniyyət nazirinin müavini Fərid Cəfərov deyib.
Nazir müavini bildirib ki, “Türk Dünyası Həftəsi” çərçivəsində təşkil olunan tədbirlər paytaxt Bakı ilə yanaşı, işğaldan azad olunmuş və bərpa-quruculuq işlərinin davam etdiyi Şuşa, Ağdam və Xankəndi şəhərlərini də əhatə edib. Səfər iştirakçıları Qarabağın bir sıra tarixi-mədəni abidələri ilə yaxından tanış olub, bölgənin zəngin mədəni irsi və adət-ənənələri barədə ətraflı məlumat əldə ediblər. Eyni zamanda, onlar işğaldan sonra aparılan bərpa və yenidənqurma işlərini yerində izləyərək tarixi irsin yenidən dirçəldilməsi prosesinin şahidi olublar.
Müxbir – Gülay Nəzərova
Bölmənin digər xəbərləri
