Rəşad Süleymanov: Yeni hücum silahlarından danışan David Tonoyan Azərbaycanın potensialına bələddir
Bakı, 27 fevral, AZƏRTAC
Ermənistanın hərbi rəhbərliyi vaxtaşırı olaraq ildə bir neçə dəfə “vuraram”, “ən yeni silahlarla zərbə endirərəm” tipli çıxışlar səsləndirir. Bu çıxışlara adətən ölkə daxilində vəziyyətin gərginləşdiyi vaxtlarda rast gəlinir. Ona görə də Ermənistanın müdafiə naziri David Tonoyanın sonuncu çıxışını da əvvəlkilərdən fərqli hesab etmirəm.
Bunu Ermənistanın müdafiə naziri David Tonayanın sonuncu çıxışına münasibət bildirən hərbi ekspert, “AzeriDefence” jurnalının bas redaktoru Rəşad Süleymanov AZƏRTAC-a açıqlamasında deyib.
R.Süleymanov qeyd edib ki, yeni hücum silahlarından danışan D.Tonoyan hər halda Azərbaycanın da potensialına bələddir. Bu gün Azərbaycan Ordusunun arsenalında yer alan döyüş vasitələri Ermənistanın ərazisində, cəbhənin dərinliklərindəki istənilən hədəfi yüksək dəqiqliklə məhv etməyə imkan verir. Sirr deyil ki, hərbi paradda və təlimlərdə nümayişlərdən göründüyü qədər Azərbaycan Ordusu son illər daha müasir, son nəsil silah və texnikalara sahib olub. Bu silahlar arasında yüksək dəqiqliyə malik raket-artilleriya sistemləri xüsusi yer tutur.
“Ermənistanın müdafiə naziri ötən həftə bizim də iştirak etdiyimiz Əbu-Dabidə beynəlxalq müdafiə sərgisinə qatılmışdı. Ermənistan nümayəndə heyəti sərginin əvvəlindən axıradək gördükləri Qərb istehsalı olan silah və texnikalarla şəkillər çəkdirirdi. Görünür, Ermənistan Müdafiə Nazirliyinin nümayəndə heyəti sərgidə gördüklərinin təsirindən hələ də ayıla bilmir.
Bu günlərdə Ermənistan Rusiya ilə Su-30SM döyüş təyyarələrinin alınmasına, eləcə də AK-12 avtomatlarının Ermənistanda istehsalına dair müqavilə imzalayıb. Görünən odur ki, Su-30 təyyarələri hələ Ermənistana gəlib çatmamış bu ölkə rəsmilərini “cuşa gətirib”. Hər halda mütəxəssislər bu təyyarələrin hansı keyfiyyətlərə malik olduğunu daha yaxşı bilirlər. Bunun üçün internetdə kiçik bir araşdırma aparmaq kifayətdir.
Azərbaycan Ermənistandan fərqli olaraq, hansısa dövlətin krediti hesabına həmin ölkənin anbarlarında qalıb, satışa getməyən silahları almır. Ölkəmiz daha çox müasir tələbələrə cavab verən və əməliyyat tapşırıqlarına uyğun silah və texnikalar əldə edir. Mübaliğəsiz deyə bilərəm ki, nəinki Ermənistanın ərazisindəki hərbi hədəfləri, hətta D.Tonoyanın evini və kabinetini də vura biləcək silahlara sahibik. D.Tonoyan və Ermənistan rəhbərliyində olanlar unutmamalıdırlar ki, Naxçıvan Əlahiddə Ümumqoşun Ordusu İrəvana çox yaxın məsafədədir”, - deyə hərbi ekspert bildirib.
Bölmənin digər xəbərləri
