“RESPUBLİKA” QƏZETİNİN BİR QRUP ƏMƏKDAŞI MÜKAFATLARA LAYİQ GÖRÜLMÜŞDÜR
AZƏRTAC xəbər verir ki, “Respublika” qəzetinin nəşrə başladığı gündən on il keçir. Bu müddətdə qəzet ölkənin ictimai-siyasi və sosial-iqtisadi həyatının obyektiv işıqlandırılması işində diqqətəlayiq uğurlar qazanmışdır. “Respublika”nın səhifələrində müstəqil Azərbaycanın bütün sahələrdə misli görünməmiş yüksəlişi öz əksini tapmışdır. Beləliklə, “Respublika” ölkəmizin aparıcı mətbuat orqanlarından biri kimi geniş oxucu kütləsinin rəğbətini qazanmış, dövrümüzün salnaməsinə çevrilmişdir. Milli mətbuatımızın 131 illiyi ərəfəsində Azərbaycan Jurnalistlər Birliyi və Azərbaycan Kütləvi İnformasiya Vasitələri İşçiləri Həmkarlar İttifaqı Rəyasət Heyəti “Respublika” qəzetinin bir qrup əməkdaşını səmərəli fəaliyyəti və qəzetin 10 illiyi münasibətilə mükafatlandırmışdır. İlham Pənahov, Esmira Fuad (Şükürova), Möhtərəm Rəcəbova Azərbaycan Jurnalistlər Birliyinin “Həsən bəy Zərdabi” diplomu ilə, Hümmət Musayev, Tofiq Əbdülhəsənli və Kamal İbadov “Araz” ali ədəbi, Səlahəddin Quliyev, Ramiz Yusifov, Xəlil Cabbarov, Əli Sadıqov “Qızıl qələm”, Zümrüd Abdullayeva “Xan qızı Natəvan” mükafatları ilə təltif olunmuşlar. Qələm dostlarımızı təbrik edirik.
