Respublika Uşaq Kitabxanası 60 ildir uşaqların maariflənməsinə xidmət edir
Bakı, 23 oktyabr, AZƏRTAC
Bu il Firidun bəy Köçərli adına Respublika Uşaq Kitabxanasının yaranmasının 60 ili tamam olur. Yarandığı gündən tarixlə gələcək arasında körpü rolunu oynayan bu nüfuzlu elm məbədi minlərlə uşağın maariflənməsində, oxu vərdişlərinin formalaşmasında və ədəbiyyata sevginin aşılanmasında mühüm rol oynayıb. Kitabxana 1967-ci ildən uşaq ədəbiyyatının inkişafında mühüm xidmətləri olan, Azərbaycan ədəbiyyatşünası, pedaqoq, maarifpərvər ziyalı Firidun bəy Köçərlinin adını daşıyır.
AZƏRTAC-ın əməkdaşları belə bir ərəfədə bu bilik və zəka məbədinin fəaliyyəti ilə yaxından tanış olmaq üçün kitabxanaya baş çəkib.
Kitabxananın direktoru, Əməkdar mədəniyyət işçisi Şəhla Qəmbərova görülən işlər, keçirilən tədbirlər, reallaşdırılan layihələr, qurulan əməkdaşlıq əlaqələri və qarşıdakı planlar barədə geniş məlumat verib.
Qeyd edilib ki, uşaqlar kitabxanada ən müasir texnologiya və metodlardan istifadə edir, nağıl otağında təşkil olunan "Nağıl saatları"nda təkcə milli nağıllarımızı deyil, dünya nağıllarını dinləyir, müzakirə edir, dünyagörüşlərini təkmilləşdirirlər.
Oxucuların informasiya tələbatının ödənilməsi ilə bağlı Firidun bəy Köçərli adına Respublika Uşaq Kitabxanası uşaq və yeniyetmələr üçün səyyar kitab sərgisini - "Uşaq kitab karvanı" layihəsini uğurla həyata keçirir. 2011-ci ildən həyata keçirilən bu layihəsi çərçivəsində artıq 41 rayona kitab karvanı yola düşmüş, 28 min 400 nüsxə kitab əyalət kitabxanalarına hədiyyə edilib.
Bildirilib ki, kitabxananın Milli ədəbiyyat və ölkəşünaslıq şöbəsində "Qızıl fond"a daxil olan 1700-ə yaxın kitab qorunur. Bura ötən əsrin 20-ci illərindən 90-cı illərinə qədər yalnız bir dəfə nəşr olunmuş kitablar daxildir.
Söhbət əsnasında öyrənirik ki, son illər kitabxana tərəfindən çoxlu sayda yeni nəşrlər işıq üzü görüb. Həmçinin 2014-cü ildə müxtəlif qurumların birgə təşkilatçılığı ilə kitabxanada görmə qabiliyyəti zəif və məhdud uşaqlar üçün dil kursları və informasiya mərkəzi açılıb.
F.Köçərli adına Respublika Uşaq Kitabxanası 2019-cu ildən etibarən uşaqlar üçün inklüziv mütaliə mühitinin yaradılması məqsədilə bir sıra mühüm layihələr həyata keçirir. Bu layihələr çərçivəsində əsas diqqət sağlamlıq imkanları məhdud – görmə, eşitmə və nitq məhdudiyyətli uşaqların cəmiyyətə inteqrasiyası və bərabər informasiya əldə etmə imkanlarının təmin olunmasına yönəlib. “Hər uşağın nağıl payı”, “Oxu saatı” və “Bərpa nəşr” layihələri çərçivəsində Azərbaycan və dünya uşaq ədəbiyyatının seçilmiş nümunələri Brayl əlifbasına və işarət dilinə tərcümə edilərək, görmə və eşitmə məhdudiyyətli uşaqlara təqdim olunub.
“Sərhəd bilməyən incəsənət” layihəsi Azərbaycan mədəniyyətinin, xüsusən də milli-mənəvi dəyərlərimizin və adət-ənənələrimizin xarici ölkələrin uşaqları arasında təbliğinə xidmət edir. Layihə çərçivəsində müxtəlif ölkələrin uşaq kitabxanaları ilə əməkdaşlıq edilir, Novruz bayramı, milli oyunlar, nağıllar və folklor nümunələri təqdim olunur.
“Açıq dərs-Açıq fikir” layihəsi çərçivəsində keçirilən tədbirlərdə Azərbaycanın ədəbi və ictimai-siyasi tarixində iz qoymuş şəxsiyyətlərin öyrənilməsi və gənc nəslin milli ruhda tərbiyəsi məqsədilə həyata keçirilir, həmçinin uşaq və yeniyetmələrin intellektual inkişafına, tarixi şəxsiyyətlərə ehtiram hissinin formalaşmasına böyük töhfə verilir.
2012-ci ildən Beynəlxalq Uşaq Ədəbiyyatı Şurasının (IBBY) milli bölməsinin üzvü olaraq Respublika Uşaq Kitabxanası hər iki ildən bir yerli uşaq ədəbiyyatının yeni və orijinal nümunələrini Beynəlxalq Uşaq Ədəbiyyatı Müsabiqəsinə təqdim edir. Bu müsabiqə çərçivəsində Azərbaycanın istedadlı uşaq yazıçıları, illüstratorları və nəşriyyatları dünya uşaq ədəbiyyatı mütəxəssisləri tərəfindən qiymətləndirilir və tanıdılır.
F.Köçərli adına Respublika Uşaq Kitabxanası 2015-ci ildən etibarən uşaqların yaradıcı inkişafını və estetik tərbiyəsini təşviq etmək məqsədilə uşaq və yeniyetmələrin iştirakı ilə musiqili-nağıl tamaşaları təqdim edir. Bu unikal layihə çərçivəsində hazırlanmış səhnə nümunələri həm uşaq ədəbiyyatını, həm də milli-mənəvi dəyərləri təbliğ edir, uşaqlarda özünəinam və yaradıcılıq bacarıqlarının formalaşmasına geniş imkan yaradır.
Burada həmçinin uşaqların və yeniyetmələrin oxu mədəniyyətini inkişaf etdirmək, mütaliəyə marağını artırmaq məqsədilə müxtəlif formatlı tədbirlər, kitab sərgiləri, müsabiqələr, debatlar, festivallar və s. təşkil edilir.
Respublika Uşaq Kitabxanasının 2006-cı ildən təsis etdiyi “Göy qurşağı” nəşri Azərbaycan uşaq mətbuatında özünəməxsus yeri olan maarifləndirici və əyləndirici nəşrlərdən biridir. Rəngarəng məzmunu, zəngin illüstrasiyaları və uşaq psixologiyasına uyğun təqdimat formatı ilə seçilən bu jurnal uşaqların dünyagörüşünün formalaşmasına, dil və yaradıcılıq bacarıqlarının inkişafına kömək edir.
Kitabxanada gördüklərimiz, eşitdiklərimiz bir daha onu deməyə əsas verir ki, 60 illik zaman heç də hədər ötməyib, saymaqla bitməyən bu işlərin həyata keçirilməsində böyük zəhməti olan bu kollektivə biz də yeni-yeni uğurlar arzuladıq.
Bölmənin digər xəbərləri
